SAM 71
Saneng len nai khumi i chiu sa nai
1 Aw Areng, nang teng y abyh ai nai kai ly ahihawi nai ne;
kai ai mana khala py, sum hai moh kyh jemjem ba!
2 Nang ly leu meitang adyh adawi nai deaungkho y,
kai ai sabawm kyh ba, atleu kyh ba.
Kai i hnei takeng nai ai tangai pi iy atleu kyh ba!
3 Nang ly kai i abyhra lengseaung pui ne;
kai ai ama hai ai nai molam y, khaw parai nai lengseaung apai lawm ba;
nang ly ai i abyhra, kai ai ama hai nai keung ne.
4 Kai i Tameuh, kai ai khumi hawi y naichi teng i nai atleu kyh ba;
pahyp y naimy ana nai khumichi kiu i nai atleu kyh ba.
5 Ati cheaungkhang sa thai nai keung aw Areng,
kai ly nang ai angdeang nai ne;
deaungdichy khala i dengdairei, nang ai kang ym bo.
6 Kai ly kaimy deungrei nang teng y abyh nai ne;
kai ai tapen khyp khala i dengdairei, nang ly kai ai ama hai bo.
Kai ly nang ai avawrei palo ai.
7 Nang ly kai i vui khaw parai nai abyhra ne nai deaungkho y,
kai ly khumichi mo y atiura lawm bo.
8 Kai ly kani khengrei nang ai palo iy,
nang i nang parai nai amthang hai bo.
9 Vai i neng y kai ly miteaung cheang nai deaungkho y, kai ai khai su moh ba.
Vai ly kho bai bo i, kai ai khai su moh kyh ba.
10 Kai i paleung ka-echi ly kai ai padei ai nai ngai u nai deaungkho y,
arum pasym u bo.
11 “Ni i Tameuh ly ni ai khai su bo;
ni ai atleu ai nai khumi leaungrei py by y nai deaungkho y,
ni ai patiu u sina,” nanai thui u bo.
12 Aw Tameuh, kamlora y awm pi veng moh ba;
kai i Tameuh, kai ai sabawm ai nai jeu kaliki kyh ba.
13 Kai ai tiu nai khumichi ly
sum iy phra u sy.
Kai tamo kalem nga pa-rei atho sa u nai khumichi ly
kangji nga iy tahm anem u sy.
14 Kai ly nang ai ajeng jojo ai;
nang ai avaw avawrei kang palo ai.
15 Kai ly nang i hawi nai sai kathui ai;
nang i atleu nai ly kai i pany nai tleaung y thiu parai nai ne;
na i py huni pahen nai satang ai kai ly kani khengrei thui ai.
16 Areng Tameuh i sa thai naira saho y kachei ai;
nang naini hawi, nanai satang kai ly amthang hai ai.
17 Nang ly kai ai deaungdichy khala i dengdairei parip nai ne i,
kai ly nang i sa nai lyh ai hawi parai naichi, vaini khrairei kathui jo nai ne.
18 Vai i neng y kai ly miteaung cheang bo i, sam py pau bo;
aw kai i Tameuh, kai ai khai su moh kyh ba!
Kai ly mo mang i katu chanau kangpreang bawibawichi teng y,
nang i sa thai naira nang parai nai satang amthang hai nai khala,
kai hawi vanrei awm kyh ba.
19 Aw Tameuh, nang i leu meitang adyh adawi nai ly kani mang y khrairei tym nai ne;
ati mana nai mo nabaly nang ly nang parai nairachi sa nai deaungkho y ne.
Nang hawi atawm nai khumi leaungrei py by y.
20 Nang ly kai ai khri pa-rei patang nairachi avum hai teu i py,
nang ly kai ai atho awm hai teang iy,
deira i nai atleu pi bo.
21 Kai ai jangni i tleaung y nang tleaung nang hai ra iy,
awmnem naira pei ali teang bo.
22 Kai ly meitang khyp, nang ai taro beu naimy kang palo ai;
aw kai i Tameuh, kai ly nang i ka-ym awm nai sai ai palo ai.
Israela chengchi i nang parai nai keung ne nai
nang ai taro beu iy khulymchi hawi palo ai.
23 Nang i vui taro beu nai thym khala y kai ly amo theu naimy khulym thui ai;
nang ly kai ai atleu nai deaungkho y,
kai ly paleung hawi verei khulym kathui ai.
24 Kai ai phra hai ai naira hau nai khumichi ly sum iy,
tahm anem u nai deaungkho y,
nang i hawi naira satang kani khengrei kathui ai.