SAM 73
PHY THOMREI
Tameuh i leu meitangnote Hebrai cha lu Asaph i thui nai.
1 Tameuh ly paleung chai nai khumichi napi nai
Israela chengchi ai meitang khyp, hawi hai nai ne.
2 Na i py khumi hawi y naichi, nang chawn nai ai kai niu nai khala,
paleung len nai khumichi ai khen ai ngai y nai paleung awm nai deaungkho y
3 kai ly kapathui khe i, atlym vi nai ne;
kai i kheuchi py athei vi na bo.
4 Huni khumichi ly no patang naira avum u y;
noso hawi iy atho awm nai khumichi ne.
5 Nichi ly takhra khumichi kamta, no patang naira avum u ai;
takhra khumichi kamta, patang naira tym u y.
6 Hunai deaungkho y nichi ly amlyh am-e nai ai pahu leng kamta py,
khrukhra naira ai baichu kangjiu kamta py ateaung u bo.
7 Nichi i paleung dengdairei hawi y nairachi patheu iy,
nichi i paleung ly kamngo nai katauchi dawn pasym u nai ne.
8 Nichi ly khumi takhrachi ai panui hai iy, chai y nairachi katheu u;
paleung len iy khumi takhrachi ai ana pumpi ai nai dawn pasym u bo.
9 Nichi ly kani pri mang y awm nai Tameuh ai mei aniu y nai leu katheu iy,
khaileaung pri y awm nai khumichi ai kado theu naimy leu pei u bo.
10 Hunai deaungkho y Tameuh i khumichi malawn py, nichi mang y abawi iy,
nichi i katheu nai leu ngierei ai ym u nai ne.
11 Nichi my, “Tameuh ly pany ai ny y leang;
salo kangteng y awm nai keung ly niu pajau ai ny y,” nanai thui u.
12 Huni ly khumi hawi y naichi i sa nai sai ne;
na i py nichi ly nang tleaung nangra bo.
13 Hunai deaungkho y kai ly amy i paleung ai chai hai iy
kamngo so y naimy awm nai ly atyhtyh lawh a?
14 Aw Tameuh, nang ly kai ai kani khengrei patangra tym hai bo;
nang ly kai ai khawn tleirei pajeng bo.
15 Kai ly hina nai kamta kathui lawh baly,
nang i khumichi i jeng y thui nai ny y leang.
16 Huna nai y kai ly hini leaungsaichi pany ai nai atho sa naimy adawn pasym bo;
na i py huni ai pany thai ai nai khri pa-rei rai parai.
17 Kai ly nang i Achura yhm theung y tym khala naini,
khumi hawi y naichi ati mana tem u ai mo, nanai kapany vau ai.
18 Nang ly nichi ai athei reng nai meingtym y
athei hai iy myh kang hai ai.
19 Nichi ly vaimy myh kang u ryp bo;
nichi i kangkhym kangtem avum nai sai ly jei ai nai hawi parai nai ne.
20 Nichi ly khawn mang y amang tami vui nai kamta ne;
aw Areng nang ang thau nai khala y, nichi ly tama u veng bo.
21 Kai ly paleung si paleung mawn iy,
paleung no-ei nai khala y,
22 amso tawnbawi kamta akhum nai deaungkho y,
kai ly nang i mo y cheng naira by y.
23 Na i py kai ly nang i sahawi y kaawm jojo;
nangmy py kai i kiu amkhaw cheng bo.
24 Nang ly kai ai tau pei naimy lam patei ai i,
kangkhym y ly kai ai tahm pasang ai nai ngai ai.
25 Kai i vui ly nang ny y baly kani pri mang y ami awm ai mo?
Nang ly kai hawi vanrei awm baly, khaileaung pri y ati aly ngai rai mo?
26 Kai i tlang hawi paleung ly atho di ai;
na i py Tameuh ly kai i ham naira ne;
kai ly nang ny y baly ami ai py aly ngai y.
27 Nang ai khai su nai khumichi ly myh kang nai avum u takengkei ai;
nang i tlang tleaung y ka-ym by y nai khumichi ai nang ly tamyh ai.
28 Na i py kai i vui ly Tameuh i sahawi y awm ai nga nai,
salo kangteng Areng teng y abyh ai nga nai hawi,
mymy i sa nai rengrang nai saichi ai, amthang hai ai nga nai ly khri pa-rei hawi parai na ly!