SAM 70
Kasabawmra nga ai nai chiu sa nainote Hebrai cha lu Davida i thui nai Sam, paleung si nai.
(Sam 40:13-17)
1 Aw Tameuh, kai ai atleu kyh ba!
aw Areng kai ai sabawm kyh ba!
2 Kai ai padei ai nai atho sa nai khumichi ly
sum iy ahei u phro sy.
Kai i ngari kamtang avum nai molam y, amo theu nai khumichi ly
anaw iy kangji ngo u sy.
3 Kai ai panui hai nai khumichi ly
sum nai molam y khri pa-rei jei hyn u sy.
4 Nang teng y ahihawi nai khumi bawibawichi ly
amo theu u sy.
Nang i atleu nai molam y kawn naimy palo u nai khumichi ly
“Tameuh ly khri pa-rei nang parai nai ne,” nanai avawrei palo u sy!
5 Kai ly atho di naimy ngari patang nai ne;
aw Tameuh, kai teng y jeu kaliki kyh ba;
nang ly kai ai atleu nai keung kai i Areng ne;
kai ai sabawm ai nai jeu kaliki kyh ba!