SAM 69
Sabawmra nga ai nai aeu iy takeng nainote Hebrai cha lu Davida i thui nai.
1 Aw Tameuh, kai ai atleu kyh ba!
tui ly kai i kaneaung ryrei ang-um na bo.
2 Kai ly thiu parai nai aneaung kapan theung y a-up bo;
kheu amchynra khaileaung katang by y;
kai ly tui kathiu mang y tym na bo;
tui sampyhchi ly kai ai ang-um ai bo.
3 Sabawmra nga ai nai ka-eu nai deaungkho y,
kai ly atho bai na bo; kai i tao ly no bo.
Nangmy sabawm ai nai angdeang ala nai deaungkho y,
4 Kai ai atyhtyh naimy niu ngai y nai khumichi i vuikanai lyRef 69.4: Sam 35.19; Jh 15.25
kai lura i sam tleaung y malawn py nawi nai ne.
Katapawp leu thui iy kai ai ka-jo hau nai khumichi ly atho awm parai nai ne.
Kai ai padei ai nai ngai u bo.
Kai ly kapaviu y nai vawnsaichi ai, nichi teng y kapei ai nai tla bo.
5 Aw Tameuh, kai i kamngochi ai, nang i mo y apha vui thai y leang;
kai ly mana tanrei akhum na mo, nanai nangmy pany.
6 Ati cheaungkhang sa thai aw Areng!
nang ai ym nai khumichi ly kai i molam y kangji ngo hai moh kyh ba.
Aw Israela chengchi i Tameuh!
nang ai chiu nai khumichi ly kai i molam y tahm anem hai moh kyh ba.
7 Kai ly nang i molam y mei aniu y naira avum bo;
khri pa-rei kangji nga bo.
8 Kai ly kaimy i amjo amnauchi theung y apany vai y nai kamta py,
yhm dengtheungra y pri takhra khumi kamta py lawm bo.
9 Nang i Achura yhm ai dawn ryh patyh nai lyRef 69.9: Jh 2.17; Rom 15.3
kai i paleung theung y mai kamta angveaung na bo;
nang ai mei aniu nai katheu naichi ly kai ai mei aniu y nai leu katheu naichi ne.
10 Kai ly biu hai nai dengdairei, amymy ai tahm apanem nai khala y,
khumichi ly kai ai mei aniu y nai sa u bo.
11 Kai ly paisiu amchiu nai khala
nichi ly ang panui hai bo.
12 Nichi ly lam y kai i satang thui u nai ne;
mhm-rah nei ala nai khumichi ly kai i satang khulym mang y thui u bo.
13 Na i py kai i vui ly aw Areng, nang teng y chiu sa hnei takeng ai;
nang i tamen naira len parai nai molam py, atleu pi ai nai nang i leu adeu nai molam py,
kang hnei kang takeng nai tangai pi kyh ba.
Aw Tameuh, aly ngai nai neng khala y,
kai i chiu sa hnei takeng nai pathang pi kyh ba.
14 Aneaung kapan theung y anum y ai nai kai ai atleu kyh ba;
paleung ka-echi teng i nai py,
tui kathiu mang i dengdairei py atleu kyh ba.
15 Kai ai tui my um hai moh kyh ba;
tui kathiu mang y anum hai moh kyh ba;
tapreaung angawm theung y ang vum hai moh kyh ba.
16 Aw Areng, nang i khaw parai nai tamen naira ly
hawi nai deaungkho y, kai i hnei takeng nai tangai pi kyh ba;
nang ly khri pa-rei pahen reng nai deaungkho y, kai mang y amhi iy khen kyh ba!
17 Nang i miseaung ai meimai hi pi veng moh kyh ba;
kai i hnei takeng nai ai, vaimy pathang pi kyh jemjem ba!
18 Jeu iy kai ai atleu kyh ba;
paleung ka-echi kiu i nai atleu pi kyh ba.
19 Kai ly mana tanrei mei aniu y naira avum iy,
mana tanrei kangji kangai nga na mo, nanai nangmy pany nai ne.
Nang ly kai i paleung ka-e bawibawichi ai niu bo.
20 Mei aniu y naira avum nai deaungkho y,
kai ly paleung mawn iy paleung phra atho di na bo.
Kai ly kapahenra kadeaung nai khala y, pahen ai nai keung avum y;
paleung awmnem naira kadeaung nai khala y,
paleung awmnem naira pei ai nai khumi by y .
21 Kai kajeu alam nai khala y, paleung ka-echi ly dei asi pacho u bo;Ref 69.21: Mt 27.48; Mk 15.36; Lk 23.36; Jh 19.28-29
tui ahai nai khala y, kreip hang katho panei u bo.
22 Nichi i cha nei pawichi ly mychi phra ai nai leaungsai lawm hai sy;Ref 69.22-23: Rom 11.9-10
nichi i sa nai reita pawichi ly mychi atlym ai naira lawm hai sy.
23 Nichi ly niu pajau y ai nai, mychi i mei paju hai ba!
Nichi i akengchi py no hai jojo sy!
24 Nang i kado theu nai ly nichi salo y lei iy,
kado theu nai haiho ly nichi ai hui kai sy ba.
25 Nichi i tairachi ly khumi angso savai tlang nai lawm sy;Ref 69.25: Amt 1.20
nichi i taichi theung y khumi leaungrei py, heng naimy awm jo moh sy.
26 Huni khumichi ly nangmy pajeng nai khumichi ai ana u bo;
nang ly tamo kalem nga hai nai khumichi i avum nai patang nai satang thui u bo.
27 Nichi i kamngo awm nai ngierei ai vuikanai sa iy, pateung me ba;
nang i atleu naira ly nichi ai ngo hai moh ba.
28 Nichi i amynchi ly heng nai khumichi i vuikanai i nai taphra nai avum sy;Ref 69.28: Theu 32.32; Amt 3.5, 13.8, 17.8
nichi ly nang i khumichi theung y vuikanai abawi y nai khumichi lawm u sy.
29 Na i py kai ly patang nai y, paleung phra atho di bo;
aw Tameuh, kai ai kateang iy atleu kyh ba!
30 Kai ly khulym hawi Tameuh ai kapalo ai;
kawn nai palo nai hawimy, nang i nang parai nai sai amthang hai ai.
31 Huna nai kamta sa ai nai Areng ly si kapathypra talam nai tleaung y kawn keh ai;
veung hawi parai nai si katai pui hawi apathyp nai tleaung y kawn keh ai.
32 Hina naichi niu nai khala y ana naira avum nai khumichi ly amo theu u ai;
Tameuh ai chiu nai khumichi ly atho nga u ai.
33 Areng ly ngari kamtang avum nai khumichi i, chiu sa hnei takeng nai tangai pi bo;
theaung tla nai mymy i khumichi ai tami pi vui y leang.
34 Kani hawi khaileaung, pangli hawi pangli theung y awm nai
heng nai amjy bawibawichi awi, Tameuh ai palo u.
35 Mymy ly Zion mawi ai atleu iy,
Juda marychi ai sa palum teang ai;
Mymy i khumichi ly huni marychira y awm naimy pri amtym u ai.
36 Mymy i miseaungchi i katu chanauchi ly pri amtym u ai;
mymy ai tamen nai khumichi ly huni pri y awm u ai nai nga ai.