SAM 7
Adyh adawi ai nai i vui y chiu sa nainote Hebrai cha lu: Davida ly Benjamin theaung i kusha molam yAreng i mo y thui nai khulym ne. \x*
1 Aw kai i Areng Tameuh, kai ly nang teng y abyh nai ne;
kai ai patiu ai nai anghau nai khumi bawibawichi kiu i nai kai ai atleu kyh ba.
2 Atleu y lawh baly nichi ly khrangsi kamta
kai ai atleu ai nai khumi by y nai meingtym mang y ryh ai i,
3-4 Aw kai i Areng Tameuh, kai ly khumi leaung leaungrei ai katamang lawh baly,
kaimy i ahawi tlang tleaung y vaineng kataphra lawh baly,
paleung ka-e ai ati sa py ny y naimy
kasa atyhtyh lawh baly,
5 paleung ka-echi ly kai ai hui nai kai iy,
kai ai tleh pajau lawh baly
kai ai khaileaung y khai u su sy.
6 Aw Areng, kado theu naimy ang thau ba!
Kai i tlang tleaung y ka-jo hau nai khumichi i kado theu nai paka pi kyh ba.
Angthau iy kai ai sabawm ba!
Nang ly leu meitang adyh adawi nai ai ngai nai deaungkho y,
7 khumi bawibawichi ai nangmy i sahawi y angym hai chum baly,
salo mang my nichi ai peang ba.
8 Aw Areng, nang ly khumi bawibawichi ai tara chih nai keung ne.
Kai ly kamngo by y nai molam y
kai ai meimai khen ly tara chih pi ba.
9 Nang ly Tameuh meitang ne;Ref 7.9: Amt 2.23
khumichi i dawn tau naichi hawi ngai nai paleungchi py chih pi nai ne.
Khumi hawi y naichi i sa tamang nai paka pi ly
khumi kahawichi ai hawi naira pei pi kyh ba.
10 Tameuh ly kai ai ama hai iy kry nai keung ne;
mymy ly mymy i leu tangai nai khumichi ai atleu bo.
11 Tameuh ly leu meitang naimy tara chih nai keung ne i,
khumi hawi y naichi ai pajeng jojo nai ne.
12 Khumichi uikheih y lawh baly
Tameuh ly haisau kata iy,
thailiho py a-eaung yb ai.
13 Dei hai thai nai ateaungchi syn iy
mai thailiho ko ai nai pateung yb bo.
14 Khumi hawi y naichi ly hawi y sa ai nai
ati mana dawn pasym mo, nanai khen cham.
15 Na i py nichi ly angawm thiu parai pa-rei tai iy,
mychi i tai nai angawm theung y mychi tla u nai ne.
16 Hunai deaungkho y nichi ly mychi i hawi y sa nai molam y, pajeng naira avum u bo;
mychi i khrukhra nai molam y tamo nga u nai ne.
17 Areng ly leu meitang ne nai deaungkho y,
kai ly mymy ai palo ai.
Salo kangteng Areng ai, kai ly khulym thui naimy palo ai.