SAM 66
Palo nai khulym hawi kawn nai leu thui nainote Hebrai cha lu khulym.
1 Khumi bawibawichi awi, Tameuh ai amo theu naimy aeu iy palo u!
2 Amyn nang parai nai sai ai khulym thui u;
mymy i nang parai nai ai palo u!
3 “Nang i sa nai saichi ly khrikhri pa-rei lyh ai hawi parai na ly!
Nang i sa thai naira ly khri pa-rei len parai nai deaungkho y,
paleung ka-echi ly nang i mo y jei naimy, abyh kajeaung kaji na bo.
4 Khaileaung pri y awm nai khumi bawibawichi ly nang ai chiu u;
nichi ly nang ai palo u bo;
nang i amyn y palo nai khulym thui u nai ne,” nanai Tameuh teng y pany hai u.
5 Tameuh i sa nai saichi hawi, khumichi i vui y
mymy i sa nai lyh ai hawi parai nai saichi ai, jeu ly khen u.
6 Mymy ly pangli ai kacheng khaileaung lawm hai nai deaungkho y,Ref 66.6: Theu 14.21; Josua 3.14-17
achi i amsi pajochi ly tavo y kheu mang angpeang u bo.
Huna nai khala mymy i sa nai leaungsaichi molam y, achi ly amo theu u nai ne.
7 Mymy ly nang parai nai hawimy peang jojo iy,
khumi cheng cheaungkhangchi i kheulang ai khen bo.
Ami py mymy ai tiu moh sy.
8 Khumi cheng bawibawichi awi, kaichi i Tameuh ai palo u;
nangchi i palo nai raawi thai sy.
9 Mymy ly achi ai dei hai y naimy, tlang heng ai nai ang pei bo;
achi ai atlym hai y nai ne.
10 Aw Tameuh, nang ly kaichi ai cham bo;
tangka ai mai hawi pachai nai kamta,
kaichi ai cham ba.
11 Nang ly kaichi ai deaung y man hai iy,
ji parai nai myn pho hai bo.
12 Nang ly paleung ka-echi ai, kaichi tlang tleaung y chiu piupa ai nai pei bo;
kaichi ly tuimai my patang hai naira avum bo;
na i py vai ly nangmy kaichi ai chymme naira y pahawi bo.
13 Kai ly nang i yhm mang y, leng patlum nai kapathypra ang syn pi ai;
nang teng y kai i adeu nai leu khaw hai ai.
14 Kai patang naira avum nai thym khala y,
leu adeu nai kamta nang teng y kang talam ai.
15 Kai ly maicham salo y leng patlum ai nai beram kang talam ai;
kai ly si hawi mi-ichi apathyp ai;
leng patlum nai kapathypra i maikhyh ly kani mang y lyn kalau ai.
16 Tameuh ai jei kaji naimy tahm khai nai khumi bawibawichi awi, jeu ly tangai u;
mymy ly kai i vui y ati mana hawi ang sa pi mo, nanai kaimy kang thui pi ai.
17 Sabawmra nga ai nai, mymy teng y kai aeu bo;
mymy ai khulymchi hawi kapalo pi ai.
18 Kai ly kaimy i kamngochi ai dawndan y naimy kaawm lawh teu baly,
Areng ly kai i chiu sa hnei takeng nai tangai pi ai ny y.
19 Na i py Tameuh ly kai i hnei takeng nai thai takengkei;
kai i chiu sa hnei takeng nai tangai pi bo.
20 Tameuh ly kai i chiu sa hnei takeng nai tangai y nai awm pi vai y nai py,
kai teng i nai khaw parai nai tamen naira ai, lo pi veng y nai deaungkho y,
kai ly mymy ai palo nai ne.