SAM 65
Palo nai hawi kawn nai leu thui nainote Hebrai cha lu Davida i thui nai Sam.
1 Aw Tameuh, nang ly chiu sa hnei takeng naichi ai pathang pi reng nai deaungkho y,
kaichi ly Zion mary y nang ai palo ai ataing nai ne.
2 Amychi adeu nai leu sa khyp ai avo nai ne;
khumi bawibawichi ly mychi i kamngo nai molam y, mymy teng y ahihawi u ai.
3 Kaichi i tamang nairachi
ly khri pa-rei nawi i py,
nang ly kaichi i kamngo palawi pi nai ne.
4 Nang i Achura yhm y awm iy, nang teng y ahihawi ai nai
nangmy vawi takhra nai khumichi ly taham hawi nai ne.
Kaichi ly nangmy i yhm dengdairei hawi nairachi,
nang i Achura yhm kachai i amtheaung nairachi nga u nai deaungkho y, paleung tienem ai.
5 Nang ly kaichi i chiu sa hnei takeng nai tangai pi iy, eaung naira nga hai bo;
lyh ai hawi naichi sa naimy, kaichi ai atleu nai ne.
Khaileaung pri verei hawi, pangli katem mang y awm u nai
khumi bawibawichi ly nang ai ym u bo.
6 Nang ly sa thai naira hawimy mawichi ai meingtym tasyh iy,
nang parai nai sa thai naira pateng bo.
7 Nang ly pangli tui amsau nai katyn hawi,
tui sampyh katynchi rym hai bo;
khumichi i khyh tukulu nai katynchi py anawn hai ai.
8 Nang i patei pi nai rengrang ka-ma-rachi molam y,
khaileaung pri verei y awm nai khumichi ly jei u nai ne.
Nang i sa nai saichi molam y khaileaung pri khuteng taki tym pa-rei,
amo theu aeu nai raawichi amsau nai ne.
9 Nang ly kanitui pala pi nai deaungkho y, khaileaung ai kry, nanai pany hai bo;
khaileaung ai khaileaung kathau kawi hai na bo.
Nang ly tavo micheaungchi ai tui kawi hai;
khaileaung y amti amjangchi thawn hai bo.
Nang i sa nai saichi ly hina nai kamta ne;
10 nang ly kani nai hai iy,
thawn piu nai li khaileaungchi ai am-i hai;
huni bo y kanitui hawi khaileaung kathau ai nau hai iy,
amti amjang keung dichi prau hai nai ne.
11 Nang ly hawi parai nai deaungkho y pakym achu nai
amti amjangchi ly khri pa-rei nawi parai na ly!
nang i tym nai meingtym tleireira y, khri pa-rei thawn parai na ly!
12 Sui tlai naira y beram kanghuchi, mi-i kanghuchi awm nai ne;
mawi aheungchi ly amo theu naimy awm bo.
13 Adym angdengchi ly beramchi hawimy kawi na bo;
leaunghawira ly chohpui chamaw keungchi khiu naimy awm.
Ati cheaungkhangchi ly amo theu nai aeu iy, khulym thui u bo.