SAM 67
Kawn nai leu thui nai khulymnote Hebrai cha lu Sam, khulym.
1 Aw Tameuh, kaichi ai tamen ly amtheaung naira pei kyh ba;
pahen nai paleung hawi, kaichi ai khen kyh ba.
2 Huna i naini khaileaung pri y awm nai khumi bawibawichi ly nang i kangai pany u ai;
khumi cheng bawibawichi ly nang i atleu pi nai pany u ai.
3 Aw Tameuh, khumi bawibawichi ly nang ai palo u sy;
khumi cheng bawibawichi py, nang ai palo u sy!
4 Nang ly khumichi ai leu meitang naimy tara chih iy,
khumi cheng cheaungkhangchi ai lam patei nai deaungkho y,
nichi ly amo theu naimy khulym thui u sy.
5 Aw Tameuh, khumichi ly nang ai palo u sy;
khumi cheng bawibawichi ly nang ai palo u sy.
6 Khaileaung ly amti amjangchi ai thawn hai;
achi i Tameuh ly achi ai amtheaung naira pei nai ne.
7 Tameuh ly achi ai amtheaung naira pei bo;
khaileaung pri meingtym tleirei y awm nai khumi bawibawichi ly
mymy ai jei kaji naimy tahm khai u sy.