SAM 64
Ama hai ai nai chiu sa nainote Hebrai cha lu Davida i thui nai Sam.
1 Aw Tameuh, kai ly patang naira avum bo;
kai i chiu sa hnei takeng nai tangai pi kyh ba!
kai ly paleung ka-echi ai jei hyn naimy awm bo;
kai i hengra ai atleu kyh ba.
2 Khumi hawi y naichi i kangviu y dawn tau naichira i nai py,
khumi hawi y nai kamkawmchira i nai py, amo hai kyh ba.
3 Nichi ly mychi i palai ai haisau kamta kata u;
kapahenra by y nai leuchi, napi nai thailihochi pateung u yb bo.
4 Nichi ly kangji by y naimy, mychi i ka-chawi leuchi ai ahei hai u kaliki bo.
nichi ly amso ngai ai hawi nai kapakei leuchi thui iy,
khumi kahawi i tahm ai taphra u bo.
5 Nichi ly hawi y nairachi ai dawn tau naira y, mychi tengtawi atho pei u bo;
nichi ly deaung kawm ai nai meingtymchi arum u iy,
“Hini deaungchi ai ami py miu pajau y,” nanai thui u nai ne.
6 Nichi ly hawi y nairachi dawn tau u iy, “Khri pa-rei tau cheng nai kalop ai
achi dawn nai ly amcheang bo,” nanai thui u nai ne.
Khumi i paleung hawi dawn tau nai sai pany ai nai khri pa-rei rai na ly!
7 Na i py Tameuh ly huni khumichi ai thailiho hawi ko iy,
vaimy tamo nga hai bo.
8 Nichi i thui u nai leusaichi molam y, mymy ly nichi ai padei iy tama hai ai;
nichi ai niu nai khumi bawibawichi ly lu heang u ai.
9 Huni khumi bawibawichi ly jei hyn naimy
Tameuh i sa nai dawn pasym iy,
mymy i sa nai kalop satangchi thui u ai.
10 Areng i sa nai kalop molam y,
khumi kahawi bawibawichi ly amo theu u ai;
nichi ly Tameuh teng y abyh u ai;
paleung y chai nai khumi bawibawichi ly mymy ai palo u ai.