SAM 63
Tameuh ai kadeaung nainote Hebrai cha lu Davida ly Juda pri khutaha daichi ka-vym y awm nai khala thui nai Sam.
1 Aw Tameuh, nang ly kai i Tameuh ne nai deaungkho y,
kai ly nang ai kadeaung nai ne.
Kai ly tlang hawi paleung verei, nang ai ajeng naimy kadeaung bo;
kai i phailo ly tui by y iy jengha nai khaileaung kamta,
nang ai kadeaung bo.
2 Meingtym kachaira y nang ai niu ai nai, kai ai pei kyh ba;
nang i sa thai naira hawi phum-ang niu ai nai pei kyh ba.
3 Nang i khaw parai nai tamen naira ly hengra tleaung y py hawi keh;
hunai deaungkho y kai ly nang ai kang palo ai.
4 Kai heng nai ryrei ly nang ai kawn naimy palo ai;
kiu pheu iy nang teng y chiu sa hnei takeng ai.
5 Kai i phailo ly tuinem nai teicha cha ai ngai nai khumi kamta,
paleung tienem naimy kaawm ai.
Nang ai amo theu parai naimy palo nai khulym thui ai.
6 Kai ly ira salo y aseaung nai thym y, nang ai pany jo ai;
vumtorei nang i satang adawn pasym naimy kaawm bo.
7 Ati mana nai mo nabaly nang ly kai ai avawrei sabawm nai deaungkho y ne.
Kai ly nang i pakhi ka-khui anui y abyh iy, amo theu naimy khulym kathui ai.
8 Kai ly nang teng y anghawi bo;
nang i kiu my ly kai ai chymme naimy khai bo.
9 Kai ai padei ai nai atho sa u nai khumichi ly
tavau kho y ang vum u ai nai tla ai.
10 Nichi ly tavai keung y dei u iy,
veu ai ly kasuichi my cha ai.
11 Tameuh ly samrang ai eaung naira pei nai deaungkho y,
samrang ly amo theu ai.
Tameuh i amyn y leu adeu nai khumi bawibawichi ly mymy ai palo u ai;
na i py ka-chawi leu teaung nai khumichi i labeaung ly amkyn me ai.