SAM 62
Tameuh my ama hai ai nai ym nainote Hebrai cha lu Davida i thui nai Sam.
1 Tameuh my kai ai atleu ai nai, kai ly paleung sau parai naimy ajeng bo;
kai ly mymy ai naini abyh nai ne.
2 Mymy naini kai i abyhra lengseaung, kai ai atleu nai keung ne;
mymy ly kai i khengsi apai lawm bo;
kai ly mana khala py sum ai ny y.
3 Nangchi bawibawi ly atlym cheaung-ang nai angpang hawi,
phra seaungkhrang nai apai kamta,
atho by y nai khumi leaungrei ai, mana tanrei kakra tiu u ai mo?
4 Nangchi ly ni ai tahm asang naira i nai paka vui ai naini dawn tau u;
nangchi ly katapawp leu katheu ai nai ngai u.
Ni ai labeaung mang amtheaungra pei iy, paleung theung y ly pasawi u bo.
5 Kai ly Tameuh ai naini abyh nai ne;
mymy ai athang khai bo.
6 Nang naini kai i abyhra lengseaung, kai ai atleu nai keung ne;
nang ly kai i khengsi apai kamta ne;
kai ly mana khala py sum ai ny y.
7 Kai i atleu naira hawi nang parai naira ly Tameuh teng i nga nai ne;
mymy naini sa thai naira len iy, ama hai nai lengseaung pui ne;
kai i abyhra ly Tameuh ne.
8 Khumichi awi, Tameuh ai ly ym u jojo;
nangchi i patang naira bawibawi ai, mymy teng y amti pi u;
mymy ly achi i abyhra ne.
9 Khumichi ly taho kathiu, taho kalau nai ryrei khyh;
khumichi i tahm asang nai anem nai, nanai py atyhtyh teu;
nichi ai nehra y neh iy khen u cham; nichi ly kaji by y leang;
taho kathiu taho kalau nai ali tleaung y py jang keh.
10 Khrukhra naira ai a-ym u moh;
lawm nai kalop hawi ly hawi naira nga ai, nanai athang khai u moh;
nangchi i yhmtheaung katuichi ly peung hai teu i py,
11 Tameuh teng y sa thai naira awm, nanai py,
mymy i tamen naira ly khaw parai, nanai py,
mymy i leu pei nai ly tlenrei khyh chang y nai kai kathai bo.
12 Aw Areng, nang ly nangmy kypkyp naimy, khumi bawibawichi aiRef 62.12: Job 34.11; Jer 17.10; Mt 16.27; Rom 2.6; Amt 2.23
mychi i atiti sa naira y hawi nai, hawi y nai vang pei pi nai ne.