SAM 61
Ama hai iy kry pi ai nai chiu sa nainote Hebrai cha lu Davida i thui nai.
1 Aw Tameuh, kai i aeu nai raawi tangai pi kyh ba;
kai i chiu sa hnei takeng nai tangai pi kyh ba!
2 Kai ly yhm hawi palo i, paleung phra atho di nai deaungkho y,
nang ai aeu naimy palau bo!
kai ai chymme naira mang y pahawi kyh ba.
3 Nang ly paleung ka-echi teng i nai kai ai ama hai nai keung,
kai i vui khaw parai nai khengsi apai ne.
4 Kai ai nang i taichy yhmra, deungrei awm ai nai pei kyh ba;
nang i pakhi ka-khui anui y chymme naimy abyh ai nai pei kyh ba.
5 Aw Tameuh, nang ly kai i adeu nai leu ai tangai pi bo;
mymy i nang parai nai sai ai palo u nai khumi teng y,
pei pi nai yhmtheaung katui ly kai ai pei ba.
6 Samrang ai ly saneng neangneang heng sau hai kyh ba;
deung kangthau khrairei heng sau hai kyh ba.
7 Aw Tameuh, ni ai ly nang i mo y deungtasarei peang hai jojo kyh ba;
nang i khaw parai nai tamen naira hawi,
ka-ym awm nai molam y ni ai ama hai iy kry kyh ba.
8 Hunai deaungkho y kai ly kaimy i adeu nai leu ai kani tleirei atyp iy,
nang ai kang palo nai khulym thui jojo ai.