SAM 60
Atleu naira nga ai nai chiu sa nainote Hebrai cha lu Davida ly Naharaim hawi Zobah mary i Armean khumichi ai tiu nai khala, Juaba ly ali teang; ni ly palawi leaunghawira Edom khumi 12,000 reichi ai tleh chum nai khala Davida i thui parip nai Sam ne.
1 Aw Tameuh, nang ly kaichi ai khai su iy sum hai;
nang ly kaichi ai kado theu hai bo.
Na i py vai, kaichi teng y jeu ali teang ba.
2 Nang ly khaileaung amchyh hai iy ako hai bo; khaileaung ly anawi naimy
awm nai deaungkho y, ako nairachi palum pi ba.
3 Nang ly nangmy i khumichi ai, patang naira tym hai bo;
kaichi ai nei cha ala nai khumichi kamta, atlym hai khikha na bo.
4 Nang ai jei kaji nai khumichi ly phra naira i nai lawira nga ai nai,
nichi ai nang ly pany hai ba.
5 Nang i sa thai naira hawimy kaichi ai atleu kyh ba;
tamen nai khumichi ly atleura nga hai ai nai,
kaichi i chiu sa hnei takeng nai tangai pi kyh ba.
6 Meingtym kachai mang dengdairei Tameuh my,
“Kai ly eaung naira nga iy, Sekhem mary ai patleh takhra ai;
Sukkoth leaunghawi ai, kai i khumichi teng y paji pi ai.
7 Kilead pri ai kaimy peang; Manase pri ai py kaimy peang;
Ephraim pri ly kai i tamo lukhym ne iy,
Juda pri ly kai i areng cheaungvawi ne.
8 Na i py kai ly Moba pri ai kai i kheu asira,
Edom pri ai kai i phainai alengra, kapalawn ai.
Philistia pri ly kai ai pajau iy, eaung naira raawi aeu pajau ai,
nanai athang khai ai,” napi.
9 Aw Tameuh, khaw parai nai mary theung y, ami my kai ai pahawi ai mo?
ami my kai ai Edom pri mang y tha ai mo?
10 Nang ly kaichi ai khai su tatang nai bo a?
Kaichi i tavaimichi hawi vanrei, tavai thau y naimy awm ai bo a?
11 Paleung ka-echi ai tiu pajau ai nai, kaichi ai sabawm kyh ba;
khumichi i kasabawm ly atyhtyh teu.
12 Kaichi mang y Tameuh my awm pi baly kaichi ly eaung ai;
mymy ly kaichi i paleung ka-echi ai tiu nai pajau vui ai.