SAM 59
Chymme naira nga ai nai chiu sa nainote Hebrai cha lu Davida ai patiu ai nai Sawla my khumi pato nai khala Davida i thui nai Sam.
1 Kai i Tameuh, kai ai paleung ka-echi kiu i nai atleu kyh ba;
kai ai ang tiu nai khumichi teng i nai amo hai ly kry kyh ba!
2 Khumi hawi y naichi kiu i nai kai ai atleu kyh ba;
khumi ai padei nai keungchi teng i nai atleu kyh ba.
3 Kai ai huni khumichi my tiu ai nai ajeng u nai ly khen cham ba!
pahyp y naimy ana nai khumichi ly kai ai ang tiu ai nai akachu u bo.
Aw Areng, huni khumichi ly kai ai tiu ai nai meingtym la u kaliki nai ly
4 kai i tamang nai sai sairei molam y ny y leang;
kai i sa nai kamngo hawi tamang nai molam py ny y leang.
5 Aw ati cheaungkhang sa thai nai Areng Tameuh,
ang thau iy kai ai sabawm ai nai jeu kyh ba;
Israela chengchi i Tameuh, nangmy kypkyp khen kyh ba!
Angthau iy tameuh pany y nai khumichi ai kamngo pajeng kyh ba;
hawi y iy ka-ym by y nai khumichi ai pahen moh ba.
6 Nichi ly mary theung y dym tengsa vawi u iy,
uichi kamta hmyh naimy aki aleaung u bo.
7 Nichi i mei aniu y naimy pajei nai leu ai ly tangai ba.
Nichi i palai ly haisau kamta ne; na i py nichi my,
“Kaichi i leu ai amimy thai ai mo?,” nanai katheu u bo.
8 Na i py awi Areng, nang ly nichi ai khen iy panui um ba;
Tameuh ai pany y nai khumi bawibawichi ai ly panui hai nai ne.
9 Kai ly nang i sa thai naira ai ym;
aw Tameuh, nang ly kai i abyhra ne.
10 Kai i Tameuh ly kai ai tamen iy, kai teng y ang jeu ai;
kai i paleung ka-echi sum u nai ly kai ai niu ai nai ang pei ai.
11 Aw Tameuh, nichi ai padei moh ba; padei lawh baly
kai i chengchi ly pany jo y ai i, tami veng ai.
Kaichi ai ama hai iy kry nai keung aw Areng,
nang i sa thai naira hawimy huni khumichi ai ahei hai phro iy, sum hai ba.
12 Nichi i labeaung, nichi i katheu nai leu ngierei molam y, kamngo sa u teang bo;
nichi ly mychi i paleung len maimy patlai teang sy!
nichi ly pasawi iy ka-chawi leu katheu u reng nai deaungkho y,
13 nang ly kado theu iy, nichi ai tamyh pawn ba;
myh kang na pa-rei taphra pawn ba.
Huna nai khala Tameuh ly Israela chengchi ai peang naimy awm, nanai py,
mymy i phum-ang ly khaileaung pri verei y ahei naimy awm, nanai py
khumi bawibawichi my pany u ai.
14 Kai i paleung ka-echi ly mary theung y dym tengsa vawi u iy,
uichi kamta hmyh naimy aki aleaung u bo.
15 Nichi ly uichi kamta aki aleaung iy, teicha teinei hau u bo;
teicha teinei bym pa-rei ngo u y baly hmyh u nai ne.
16 Na i py kai ly nang i sa thai naira satang khulym thui ai;
nang i khaw parai nai tamen naira satang ai, khawn tleirei khulym thui ai.
Nang ly kai i abyhra khengsi apai,
patang naira avum nai khala y kai i abyhra ne.
17 Kai mang y ama hai nai keung, kai ly nang ai kang palo ai;
Tameuh ly kai i abyhra,
kai ai tamen nai keung Tameuh ne.