SAM 58
Khumi aso y naichi ai pajeng ai nainote Hebrai cha lu Davida i thui nai Sam.
1 Nangchi peang nai keungchi awi, nangchi ly leu meitang naimy tara chih ai nai sa u a?
Khumi bawibawichi ai leu meitang adyh adawi naimy tara chih u a?
2 Nangchi ly huna nai kamta so y, nangmychi hawi y sa ai naini dawn u iy,
pri theung y athorei my khrukhra nairachi sa u bo.
3 Hawi y sa nai khumichi ly mymychi deungrei, tamang nairachi naini sa u khyh;
nichi ly mymychi tapen khyp khala i my, ka-chawi leu katheu u reng nai ne.
4 Nichi ly thailai awm nai pavuichi kamta ne;
kano pang nai pavui thauvau ly
5 pavui sara i raawi ai py, mei amhyp kawp nai sara i atam nai ai py, thai y;
nichi ly kano pang nai pavui thauvau kamta, mychi i kano tamym u bo.
6 Aw Tameuh, hini si parai nai khrangsi i nuchi ai khei pi vui ba.
7 Nichi ly leaung iy tama pawn reng nai tui kamta lawm u sy;
khumi tako nai lamra i acha keungchi kamta, tei piu veng sy.
8 Nichi ly khai ju pawn reng nai naikanachi kamta lawm u na sy;
kangvang ai mana khala py niu y nai, pahaw vui nai deaungdi kamta lawm u na sy.
9 Nichi ly athang khai y nai neng khala y acha keungchi kamta, ateng pawn nai avum u bo;
Tameuh ly khri pa-rei kado theu nai deaungkho y,
nichi ai tama hai pawn ai.
10 Khumi kahawichi ly kamngo sa nai khumichi ai pajeng naira avum nai niu nai khala, amo theu u ai;
nichi ly khumi aso y naichi i thi y kheu asi u ai.
11 Khumichi my, “Khumi kahawichi ly meitang khyp, kawn vang nga u bo;
khaileaung pri ai tara chih nai keung Tameuh ly
awm khypkhyp nai ne,” nanai thui u ai.