SAM 57
Kasabawmra nga ai nai chiu sa nainote Hebrai cha lu Davida ly tapiu theung y awm nai Sawla teng i preang nai bo y thui nai Sam ne.
1 Kai ly nang teng y abyh ai nai ahihawi nai ne;
hunai deaungkho y kai ai pahen kyh ba; aw Tameuh pahen kyh ba.
Ali pui khu pui theu nai aham nai ryrei,
kai ly nang i pakhi ka-khuira y abyh nai ne.
2 Kai i ngai nai ngiereichi ai pei nai keung
tahm asang parai nai Tameuh teng y, kai ly kahnei bo.
3 Mymy ly kani pri mang dengdairei pathang iy, kai ai atleu bo;
kai ai ana pumpi nai khumichi ai tiu pajau ai.
Tameuh ly mymy i khaw parai nai tamen naira hawi
ka-ym awm naira ly kai ai patei pi ai.
4 Paleung ka-echi ly khumi ngan cha nai khrangsichi kamta,
kai ai ang katanmeuh bo.
Nichi i hochi ly tivichi, thailiho chynchi hawi atawm;
nichi i palai ly haisau bo nyhrei kamta chiu nai ne.
5 Aw Tameuh, nang i tahm asang nai sai ai kani mang y py,
nang i nang parai nai ai khaileaung pri verei y py, amteng hai kyh ba.
6 Paleung ka-echi ly kai ai patiu ai nai py jang u bo;
kai ly khrikhri pa-rei paleung mawn naira avum nai ne.
Nichi ly kai i tako nai lam y angawm tau u bo;
na i py huni angawm theung y mychi naimy tla u nai ne.
7 Aw Tameuh, kai ly nang ai ym tatang bo;
hunai deaungkho y kai ly khulym thui naimy nang ai palo ai!
8 Aw kai phailo! anglaw jau;
kai i taro katheang kalenchi awi! anglaw u;
kai py kanito ai anglaw hai ai.
9 Aw Areng, kai ly khumi cheng cheaungkhangchi theung y,
nang ai kawn naimy palo ai.
Khumi cheng bawibawichi theung y, nang ai kang palo ai.
10 Nang i khaw parai nai tamen naira ly kani mang y khrairei py,
nang i ka-ym awm nai ly kani laileaung y khrairei py tym nai ne.
11 Aw Tameuh, nang i tahm asang nai sai ai kani mang y py,
nang i nang parai nai ai khaileaung pri verei y py, amthang hai kyh ba.