SAM 48
Tameuh i mary pui Zionnote Hebrai cha lu Korah nupaichi i thui nai sam.
1 Areng ly nang parai keh nai ne iy, chai parai nai mawi pui napi nai
achi i Tameuh i mary puira y, khri pa-rei palo ai ataing nai ne.
2 Tameuh i mawi pui napi nai Zion mawi ly asang iy, apu parai nai ne;Ref 48.2: Mt 5.35
nang parai nai samrang i mary pui ly khaileaung pri khumichi ai amo theu hai bo.
3 Huni mary pui i amtangrachi theung i mymy teng y
chymme naira awm, nanai Tameuh my patei pi bo.
4 Samrangchi ly akachu u iy,
Zion mawi y tiu ai nai tavai amsa u bo.
5 Huni mawi ai niu nai khala nichi ly
lyh parai nai y jei u i, angpreng u pawn bo.
6 Nichi ly deaungdi tapen ai nai neng kasa nai neampachy kamta py,
khri pa-rei aho nai ali kamchai avum nai deaungkho y,
7 liliu nanai sampho puichi kamta py, jei hyn u bo.
8 Mymy sa nai leaungsaichi achi thai vai bo;
huna nai thai u vai nai kamta,
ati cheaungkhang sa thai nai keung napi nai Tameuh i mary puira y, vai achi niu u bo.
Mymy ly huni mary pui ai deungtasarei chymme ai nai khai ai.
9 Aw Tameuh, nang i Achura yhm theung y kaichi ly
nang i khaw parai nai tamen nai satang ka-dawn u bo.
10 Meingtym tleirei y khumi bawibawichi ly nang ai palo u;
nang i satang ly khaileaung pri verei y amthang nai ne.
Nang ly leu meitang naimy peang bo.
11 Zion mary i khumichi ly amo theu u sy!
Mymy ly leu meitang naimy tara chih bo;
Juda pri mary kalenchira y amo theu naira awm sy!
12 Tameuh i khumichi awi, Zion mawi ai taki iy,
amtangra yhmchi ai kati u.
13 Huni mary i apaichi ai ma-kheng iy,
amtangrachi ai py khen u.
14 Huna nai khala nangchi ly “Hini Tameuh ly deungtasa khrairei achi i Tameuh ne;
mymy ly achi ai deungtasarei ang pahawi ai,” nanai
mo mang i deung kangthauchi teng y thui pi pajau ai.