SAM 49
Yhmtheaung katui ai a-ym nai ly khumi ka-khumnote Hebrai cha lu Korah nupaichi i thui nai Sam.
1 Khumi bawibawichi awi, hini leu tangai u!
tahm asang nai hawi tahm anem nai,
2 kamawn hawi kanang patleh takhra y nai,
meingtym tleirei y awm nai khumi bawibawichi awi, tangai u.
3 Kai ly hawihai palai adawn pasum ai;
cheng naira hawi amlau nai leuchi katheu ai.
4 Kai ly thui achi nai leuchi ai kano patheung iy, adawn pasym ai;
hunichi i awm nai saichi ai taro beu naimy thui pachai pi ai.
5 Khumi hawi y nai paleung ka-echi ly kai ai ang taki meuh nai khala y,
kai ly rai naira avum i py, jei hyn ai ny y.
6 Nichi ly mychi i yhmtheaung katui ai a-ym nai khumichi,
nang chawn naira y amlyh nai khumichi ne.
7 Khumi ly mana khala py amymy ai atleu pajau y;
amy i hengra vang kateng ai Tameuh teng y pei teang pajau y.
8 Ati mana nai mo nabaly khumi i hengra vang ly khri pa-rei vang teng parai nai deaungkho y ne.
Ni ly mana khala py hengra vang pei pajau y nai deaungkho y ne.
9 Ati mana nai y deungtasarei heng naimy awm pajau ai mo?
Ati mana nai y tapreaung angawm theung y tlo y nai awm pajau ai mo?
10 Khumi kachengchi py, akhum iy katau by y naichi py,
dei nai lam y en vui pajau y, nanai ami mi py pany pajau nai ne.
Nichi bawibawi ly mychi i yhmtheaung katuichi ai
katu chanauchi i vui khai pi ai tla nai ne.
11 Vaichi khala nichi ly khaileaung peang nai keungchi ne lawh teu i py,
vai i neng y ly tapreaung angawmchira naini,
huni khumichi awm jojo ai nai deungtasarei yhmchi lawm bo.
12 Khumi ly nang chawn nai y khaw nai ny y leang;
ni ly tawnbawichi kamta dei teang ai.
13 Amymychi ai a-ym nai khumichi, amymychi nang chawn nai hawi,
paleung tuinem naichi i khym taham ly khen u.
14 Nichi ly beramchi kamta dei u ai nai ne.
Deira ly nichi i beram typ keung lawm ai.
Nichi i tlang ly mychi i yhm hawi palo parai nai tavau pri y
kra y naimy veaung tlawn nai khala,
khumi kahawichi ly nichi ai pajau u ai.
15 Na i py Tameuh ly kai ai atleu ai;
deira areng kiu i nai kai ai atleu ai.
16 Khumi leaungrei ly nang chawn iy, ni i yhmtheaung katui py
nawi tleaung nawira nai khala, nang ly paleung hawi y nai awm mo?
17 Ni ly dei nai khala y huni yhmtheaung katui syn jo thai y;
Huni yhmtheaung katui ly ni hawi vanrei tapreaung angawm theung y abang thai nai ny y.
18 Khumi ly my i deung y paleung tuinem iy,
my i eaung naira molam y palo naira avum teu i py,
19 dei nai khala ly amsi pajochi awm nai
deungtasa meingtym mang y chei ai nai tla ai.
20 Khumi ly nang chawn teu i py,
tawnbawichi kamta dei teang ai.