SAM 47
Sa thai naira len keh nai samrangnote Hebrai cha lu Korah nupaichi i thui nai Sam.
1 Khumi cheng cheaungkhangchi awi, amo theu nai kiu tabeang u!
Tao pajeng parai naimy khulym thui iy, Tameuh ai palo u!
2 Tahm asang parai nai Areng ly ka-jei hawi parai;
mymy ly khaileaung pri verei y peang nai, nang parai nai samrang ne.
3 Mymy ly achi ai khumi cheng cheaungkhangchi ai pajau hai iy,
pri tleireichi ai peang hai bo.
4 Mymy ly achi awm ai nai pri vawi takhra pi;
huni pri ly mymy i tamen nai khumichi my amtym iy,
tahm khai amlyh ai naira lawm bo.
5 Tameuh ly mymy i atehra bailang mang y lyn kalau bo;
Areng lyn kalau nai khala, amo theu aeu nai raawichi hawi
baw eng nai katynchi thai u nai ne.
6 Tameuh ai ly palo u;
achi i samrang ai palo nai khulym thui pi u!
7 Tameuh ly khaileaung pri verei i samrang ne;
khulymchi hawi mymy ai palo u!
8 Tameuh ly mymy i chai parai nai atehra bailang salo y ateh bo;
pri neangneangchi ai peang nai ne.
9 Pri tleireichi ai peang nai samrangchi ly jeu iy,
Abraham i chiu nai Tameuh i khumichi hawi vanrei achu u bo.
Mymy ly khaileaung pri y awm nai tavaimi ngiereichi tleaung y sa thai naira awm keh;
mymy ly sa thai nai ra awm keh nai samrang ne.