SAM 46
Tameuh ly achi hawi vanrei awmnote Hebrai cha lu Korah nupaichi i thui nai khulym.
1 Tameuh ly achi i abyhra, achi i atho ne;
patang naira avum nai khala y, achi ai sabawm ai nai angveirym jojo.
2 Hunai deaungkho y khaileaung ahyn naimy mawichi ly
suida pangli theung y tla teu i py,
3 pangli tui sampyh theu i, tyn amsau nai deaungkho y,
mawichi ahyn teu i py, achi ly jei hyn ai ny y.
4 Tameuh i mary pui napi nai tahm asang parai nai
Tameuh i yhm y amo theu hai nai tavo awm.
5 Huni mary pui ly Tameuh i awm naira ne nai deaungkho y, mana khala py phra pajau y;
khutawi mo neng khala mymy ly ang jeu iy, huni mary y sabawm ai.
6 Khumi cheng cheaungkhangchi ly jei hyn u ai;
Tameuh my leu pei nai khala y khaileaung ly tlawn vui nai ne.
7 Ati cheaungkhang sa thai nai Areng ly achi hawi vanrei awm;
Jakob i Tameuh ly achi i abyhra ne.
8 Jeu u, Areng i sa pi nai saichi ai khen u;
khaileaung pri y sa pi nai, lyh ai hawi parai naichi khen u.
9 Mymy ly khaileaung pri verei y atiu naichi ai anawn hai bo;
thailihochi ai khei vui iy, tivichi tameang pawn iy,
khopuichi ai py mai y veang pawn bo.
10 Mymy ly “Atiu naichi anawn u; kai ly khumi cheng cheaungkhangchi theung y py,
khaileaung pri verei y Tameuh nang parai nai ne, nanai pany u,”
11 Ati cheaungkhang sa thai nai Areng ly achi hawi vanrei awm;
Jakob i Tameuh ly achi i abyhra ne.