SAM 45
Samrang i apom pawi khulymnote Hebrai cha lu korah i nupaichi thui nai khulym leu; akhrei nai khulym.
1 Samrang i vui hini khulym katajiu nai thym y,
kai i paleung ly taham hawi nai leuchi kawi na bo.
Kai i labeaung ly cha tajiu keung kahawi
leaungrei i cha kaleaung hawi atawm.
2 Nang ly khumi neangneangchi tleaung y mo-cha hawi nai ne.
Vang teng nai leu katheu reng.
Hunai deaungkho y Tameuh teng i amtheaung naira nga jojo nai ne.
3 Sa thai naira len parai nai keung awi, haisau atai ba;
samrang ly sa thai naira hawi phum-ang kawi angym nai ne.
4 Ka-ym awm nai hawi adyh adawi naira my peang ai nai molam,
sa thai naira haiho hawi vanrei atiu iy, eaung naira ngo ba!
Samrang nang ly nangmy i haiho hawimy, eaung pawi puichi avum ai.
5 Nang i thai meaungchi ly chiu nai deaungkho y,
paleung ka-echi i paleung pakawi y pri na bo.
Khumi cheng cheaungkhangchi ly nang i kheu keung y atlym u nai ne.
6 Nang ai Tameuh my pei nai atehra bailang lyRef 45.6-7: Heb 1.8-9
deungtasarei awm ai.
Nang ly nangmy i pri ai leu meitang adyh adawi naimy peang bo.
7 Nang ly leu meitang ai ngai iy, hawi y naira ai niu ngai y bo.
Hunai deaungkho y nang i Tameuh napi nai Tameuh ly nang ai vawi takhra nai bo y,
takhra samrang bawibawichi tleaung y tahm asang iy,
amo theu naira napi nai asitui lei pi bo.
8 Nang i ateaungchi ly mura, akjaw, sinamon mui katuichi mui amseaung na bo.
Katyn kapau beu kawp naichi ly kasai nuh samrang yhmchira y, nang ai ang beu pi nai ne.
9 Nang i samrangnu ai kry naichi theung y, pri tleirei i samrang chaniuchi abawi nai ne.
Nang i samrang atehra bailang lamtang mang y, muku tangcheng hawi sa nai
ateaungchi ai amthyp nai samrangnu angdo naimy awm bo.
10 Samrang i aju awi, kai i thui nai leu tangai ba.
Nang ly nangmy i chengchi hawi, amjychi ai tami veng ba.
11 Nang i hawi parai nai mo-cha ly samrang my nang ai khrei hai keh ai mang.
Samrang ly nang i areng ne nai deaungkho y, nang ly ni i leu tangai ai nai tla.
12 Turu pri khumichi ly nang teng y langseaungchi syn pi ai.
Nang chawn nai khumichi ly nang teng i meimai nga ai nai atho sa u ai.
13 Samrangnu ly samrang yhm y tym bo; ni ly mo-cha khri pa-rei hawi parai na ly!
Ni i ateaung ly muku kalang hawi aneng nai ne.
14 Ni ly mawi-en sadi nai ateaung amthyp iy, samrang teng y hawi u bo.
Samrangnu nithun abang nai anglochi ai py,
samrang teng y hawi u nai ne.
15 Nichi ly amo theu naimy ang jeu u i,
samrang i yhm y kun u bo.
16 Kai i samrang awi, ngamsi pajochi i meingtym amtym ai nai molam y,
samrang nang ly chapo neangneang nga ai;
Nang ly nichi ai khaileaung pri meingtym tleirei y samrang sa hai ai.
17 Kai i khulym ly nang ai deungtasarei amtheaung hai ai;
khumi bawibawichi my py, nang ai ang palo u jojo ai.