SAM 44
Ama hai ai nai chiu sa nainote Hebrai cha lu Korah i nupaichi thui nai khulym leu.
1 Aw Tameuh, jangni amsi pajochi deung y,
nangmy sa pi nai leaungsaichi satang ai
nichi my thui pi nai deaungkho y,
kaimychi thai khyp bo.
2 Nangmy naimy cheng takhra khumichi ai patheu vui iy,
nang i khumichi ai hini pri y meingtym pala pi nai py,
cheng takhra khumichi ai kamngo pajeng iy,
nangmy i khumichi ai lo pa, nang chawn hai nai satang py thui pi bo.
3 Nang i khumichi ly huni pri y haisauchi hawi peang u nai ny y leang;
mychi atho hawi py peang vui nai ny y leang;
nang i sa thai naira haiho hawi, nang ly nichi ai tamen nai deaungkho y
nichi hawi vanrei nangmy awm pi nai molam py,
nichi ly huni pri y peang vui pajau nai ne.
4 Nang ly kai i samrang, kai i Tameuh ne;
nang i khumichi ai eaung naira pei pi bo.
5 Kaichi ly nang i sa thai naira molam y, paleung ka-echi ai pajau nai ne.
6 Kai ly kaimy i thailiho ai a-ym y leang;
kai i haisau py, kai ai atleu pajau y leang.
7 Na i py nang ly kaichi ai paleung ka-echi kiu i nai atleu iy,
kaichi ai niu ngai y nai khumichi ai pasum bo.
8 Kaichi ly nang ai palo jojo iy,
kawn naimy deungtasarei palo ai.
9 Na i py vai ly nangmy kaichi ai khai su iy sum hai bo.
kaichi i tavaimi kamkawmchi hawi vanrei, tavai thau hai y bo.
10 Nang ly kaichi ai paleung ka-echi teng i nai angpreng hai bo;
nichi ly kaichi i vawnsaichi la pi pawn veng nai ne.
11 Nang ly kaichi ai beramchi kamta tleh hai iy,
pri takhra mang y ahei hai bo.
12 Nang ly nangmy i khumichi ai vang kadi hawi jo vui bo;
ati kamran py ngo y nai ne.
13 Kaichi i tlang tleaung y nang i sa naichi ai yhm deaungpachi ly niu i,
kaichi ai preaung iy panui hai u bo.
14 Nang ly kaichi ai khumi cheng cheaungkhangchi my, mei aniu y ai nai lawm hai bo;
nichi ly kaichi ai tahm khai y nai lu thiu hai u bo.
15 Paleung ka-echi hawi
vawitheung tha nai khumichi i,
16 tahm khai y naimy mei aniu y nai katheu nai leuchi molam y,
kai ly tahm anem iy kangji nga jojo nai ne.
17 Kaichi ly nang i sa pi nai leu maikawm ai kataphra u y nai ne.
Nang ai py katami u y leang.
Na i py hini ngari kamtangchi ai kaichi avum u bo.
18 Kaichi ly nang i tlang tleaung y vaineng taphra u y leang;
kaichi ly nang i leu pei naichi tangai y nai by y leang.
19 Na i py nang ly kaichi ai daichi mawi kasichi awm nai meingtym y
kajeaung kamang khai su bo.
Veng keh nai meingtym y aphi su iy, khai nai ne.
20 Kaichi ly kaimychi i Tameuh ai chiu y naimy,
pri takhrachi i tameuh teng y chiu sa hnei takeng u lawh baly,
21 meitang khyp, nangmy pany ai nai ne. Ati mana nai mo nabaly,
nang ly khumichi i dawn paviu nai katauchi pany nai deaungkho y ne.
22 Na i py nang ai ka-ym awm nai molam y, kaichi ly avawrei deira hawi ka-vum u nai ne.Ref 44.22: Rom 8.36
Tleh ai khai yb nai beramchi kamta, khumi takhrachi my athang khai naira avum u bo.
23 Aw Areng, anglaw ly ang thau ba!
Nang ly ati mana nai y i pi vui lawh mo?
Angthau ba! Kaichi ai deungtasarei khai su moh kyh ba!
24 Nang ly ati mana nai y kaichi teng i nai meimai hi pi lawh mo?
Kaichi i no patang nai hawi, ngari kamtangchi ai tami pi veng moh kyh ba!
25 Kaichi ly khaileaung y tym pa-rei tamyh naira avum u bo.
Sum nai deaungkho y spryhra y atlym u bo.
26 Angthau iy kaichi ai sabawm ba!
Nang i khaw parai nai tamen nai saho y atleu kyh ba!