SAM 42
PHY NYHREI
Pri pala naira avum nai khumi leaungrei i chiu sa nainote Hebrai cha lu Korah i nupaichi thui nai khulym leu.
1 Aw Tameuh, sisiu chakhi ly savai tleng nai tavo tui kadeaung nai kamta,
kai ly nang ai kadeaung nai ne.
2 Tameuh kangheng napi nai, nang ai kai ly kadeaung bo.
Kai ly mana khala y nang i mo y ahihawi iy, chiu sa pajau ai mo?
3 Kai ly vum, kanithun vo nai deaungkho y,
mei katuichi ly kai i teicha teinei lawm na bo.
Paleung ka-echi my kai teng y, “Nang i Tameuh ly ma mang y awm mo?,”
nanai avawrei angdeang u bo.
4 Amo theu khulym thui naimy Tameuh ai palo iy,
Tameuh i yhm mang y chei nai khumi mipuichi awi,
kaimy kapahawi nai pany jo nai khala,
kai ly paleung ama nai ne.
5 Kai ly ati mana nai y paleung ama lawh mo?
Ati mana nai y paleung bi paleung mawn lawh mo?
Kai ly Tameuh ai athang khai naimy kaawm ai.
Kai i atleu keung,
kai i Tameuh ai kapalo bi ai.
6-7 Pri pala naira kai avum nai thym khala, kai i paleung si parai nai ne.
Naibaly kai ly nang ai kapany jo nai ne.
Nang ly Heramon mawi hawi Mizara mawi dengdairei,
Jordan tavo y kaleng tui leaung nai kamta,
paleung mawn nai tui sampyhchi pato pi iy,
katyn kamsau ly kai ai ang khiu na bo.
8 Kanithun neng khala y Areng ly mymy i khaw parai nai tamen naira patei pi na sy;
naibaly vum aneng khala kai ly khulym thui iy,
kai ai hengra pei nai keung Tameuh teng y chiu kasa pajau ai.
9 “Nang ly ati mana nai kai ai tami vui lawh mo?
Ati mana nai kai ly paleung ka-echi i,
pahyp y naimy ana nai avum lawh mo?,” nanai
kai ai ama hai nai keung Tameuh teng y katakeng bo.
10 Kai i paleung ka-echi my, “Nang i Tameuh ly ma y mo?,” nanai
kai ai avawvawirei angdeng i, nichi mei aniu y nai molam y,
kai ly khri pa-rei paleung phra atho di bo.
11 Kai ly ati mana nai y hina tanrei paleung atho di ai mo?
Ati mana nai y paleung bi paleung mawn ai mo?
Kai ly Tameuh ai athang khai ai;
kai i atleu keung,
kai i Tameuh ai kapalo bi ai.