SAM 41
No nai khumi leaungrei i chiu sa nainote Hebrai cha lu: Davida i thui nai Sam.
1 Khumi kamawnchi i vui y paleung mawn hai nai khumi ly taham hawi;
huni khumi patang naira avum nai khala y, Areng my sabawm ai.
2 Areng ly ni ai ama hai iy, ni i hengra ai py kry ai.
Mymy ly ni ai pri theung y amo theu parai naimy awm ai nai pei ai.
Paleung ka-echi i kiu tleaung y au ai ny y.
3 Ni i no patang nai neng khala y Areng ly sabawm ai i,
ni ai noso hawi hai teang ai.
4 Aw Areng, kai ly nang i tlang tleaung y kamngo sa bo.
Kai ai pahen iy noso hawi hai kyh ba, nanai takeng bo.
5 Paleung ka-echi ly kai i satang hawi y nai thui u bo.
Nichi my, “Hini khumi ly mana khala dei iy, khumichi my ni i amyn
mana khala tami ai mo?,” nanai ka-e paleung katheu u bo.
6 Kai teng jeu iy khen u nai khumichi ly paleung ka-dawn kahawi awm nai khumichi ny y;
nichi ly kai i satang hawi y naichi hau nai,
meingtym tleirei y chei iy thui u reng nai ne.
7 Kai ai niu ngai y nai khumi bawibawichi ly
kai i satang ai, mychi tengtawi leu kamsyh y arum u bo.
8 Nichi my, “Hini khumi ly deivi pa-rei no nai ne.
Ira tleaung i nai mana khala py, ang thau bi pajau ai ny y,” nanai thui u bo.
9 Kai i khrei keh nai, kai i ka-ym awm keh nai,Ref 41.9: Mt 26.23; Mk 14.18; Lk 22.21; Jh 13.18
kai hawi vanrei biu o ahawi nai khumi,
kai i ahawi my malawn py, kai ai kheu hawi ang pathui bo.
10 Aw Areng, paleung ka-echi ai vawitheung tha pajau ai nai,
kai ai pahen iy noso hawi hai teang kyh ba.
11 Paleung ka-echi ly kai ai eaung ai ny y nai deaungkho y,
kai i tlang tleaung y nangmy khrei, nanai kai pany pajau ai.
12 Kai ly kateng sa nai khumi ne nai deaungkho y, mymy ly kai ai
sabawm nai ne i, mymy i mo y deungtasarei awm ai nai pei ai.
13 Israela chengchi i Tameuh ne nai Areng ai ly palo u!Ref 41.13: Sam 106.48
Mymy ai vai i dengdai, deungtasa khrairei palo u!
Amen! Amen!