SAM 38
No patang nai khumi leaungrei i chiu sa nainote Hebrai cha lu: Davida i thui nai Sam, tangam nai.
1 Aw Areng, kado theu iy kai ai kamngo pajeng moh kyh ba!
2 Nang ly kai ai thailiho hawi ko iy tamo nga hai bo.
Nang i kiu my nui i, kai ai atlym hai bo.
3 Nang i kado theu nai molam y kai ly no patang naira avum nai ne.
Kaimy i kamngo nai molam y tlang verei no-na man bo.
4 Kamngo tui my um naira y kai ly anum nai ne.
Hunichi ly khri pa-rei ji nai kamngo mynji ne i, kai ly pho pajau y na bo.
5 Kaimy i akhum nai molam y nga nai tamochi ly
kaveaung mui na bo.
6 Kai ly khri pa-rei patang naira avum i, tahm anem naimy awm bo.
Kani khengrei paleung si naimy kavo nai ne.
7 Kai ly keaung kabi len nai deaungkho y,
dei vi na bo.
8 Kai ly paleung ka-dawn akawm i, atho bai nai khikhe na bo.
Kai ly paleung akawm naimy no patang nai y, tangam nai ne,
9 Aw Areng, nang ly kai i kangai pany pi.
Kai i tangam nai raawi thai bo.
10 Kai i paleung ly ahyn thlyh thlyh na; kai teng y atho by y leang bo.
Kai i mei py angvang y bo.
11 Kai i tamo angvawichi molam y ahawichi hawi
yhm deaungpachi ly kai i sahawi y ahai u y.
Kaimy i yhm dengtheungchi malawn py, kai teng y jeu u y na bo.
12 Kai ai padei ai ngai naichi ly deaungchi pateung u bo.
Kai ai patang hai ai ngai naichi ly ang pajei u nai ne.
Nichi ly kai ai padei ai nai avawrei patym u bo.
13 Kai ly kano pang nai khumi kamta, kano thai y.
Leu kawp y nai khumi kamta, leu katheu thai y bo.
14 Kai ly kano pang nai deaungkho y,
leu katheu kawp y nai khumi kamta lawm bo.
15 Na i py aw Areng, kai ly nang ai kang-ym nai ne.
Hunai deaungkho y kai i Areng Tameuh,
nang ly kai i hnei takeng nai pathang pi ai.
16 Kai i patang nai molam y paleung ka-echi ai paleung ateng hai ai nai pei moh.
Nichi ai kai i atlym nai molam y amlyh ai nai pei pi moh.
17 Kai ly atlym vi na bo;
avawrei no patang nai ne.
18 Kai ly kaimy i kamngochi ahui bo.
Huni kamngochi molam y, paleung mawn parai nai ne.
19 Kai i paleung ka-echi ly noso keaungno by y;
atyhtyh naimy kai ai niu ngai y nai khumichi ly nawi parai.
20 Kai ly kateng sa ai nai atho sa nai deaungkho y, hawi naira ai
hawi y naira hawimy patlai reng nai khumichi ly kai ai ka-awi sa u bo.
21 Aw Areng, kai ai khai su moh ba;
kai i Tameuh, kai hawi kamlo y awm vui moh ba!
22 Kai ai atleu nai keung Areng, vaimy kai ai sabawm ba!