SAM 39
No patang nai khumi leaungrei i chiu sa nainote Hebrai cha lu: Davida i thui nai Sam.
1 “Kaimy i sa nai sai molam y adawn patyp ai;
labeaung hawi malawn py tamang y ai nai adawn patyp ai.
Khumi hawi y nai sahawi y kaawm nai thym khala y,
kai ly ati sai py katheu y naimy awm ai,” nanai kai ly thui bo.
2 Kai ly leu sairei py katheu y naimy kaawm pypy bo;
leu kahawi malawn py katheu y nai ne.
Na i py kai i no patang nai ly ty tleaung tyra lawh.
3 Kai ly paleung bi, paleung mawn naira tym bo;
adawnra, paleung bira nai ne.
“Aw Areng, kai ly mana tanrei heng sau ai mo?
4 Mana khala kadei ai mo?
Kai ai dei naira satang pany hai ba,” nanai
nang teng y deng y naimy awm pajau y bo.
5 Nang ly kai ai khri pa-rei deung dawi hai lawh ly!
Nang i mo y kai i heng nai sai ly ati sai py ny y nai kamta ne.
Meitang khyp, heng nai amjy khumi angso nanai ly
taho kathiu, kaho kalau nai ryrei khyh.
6 Pa-pui kamta tanareichy heng khyh.
Ni i sa nai leaungsaichi ly atyhtyh teu;
ni ly yhmtheaung katui pateung achu teu i py,
mani ai ly ami my amtym ai mo, nanai ni ly pany y leang.
7 Hunai deaungkho y aw Areng, kai ly mani ai athang khai pajau ai mo?
Kai ly nang ai athang khai nai ne.
8 Kai ai kamngo bawibawira i nai atleu kyh ba.
Kai ai khumi ka-khumchi my panui hai moh sy.
9 Nang ly kai i tlang tleaung y hina nai no patang hai nai deaungkho y, kai ly kaawm pypy ai;
leu sairei py katheu y leang bo.
10 Kai i tlang tleaung y kamngo pajeng bi moh kyh ba!
Nangmy pei nai tamo kalemchi molam y, kai ly kadei vi na bo.
11 Nang ly khumi ai mymy i kamngo molam y parip iy pajeng bo.
Ni i ngaiphi nai saichi ai mipo kamta, nangmy taphra pi pawn veng bo.
Meitang khyp, khumi ly taho kathiu, taho kalau nai ryrei khyh lawh ly!
12 Aw Areng, kai i chiu sa nai tangai pi kyh ba.
Kai i hnei takeng nai tangai pi kyh ba;
kai vo nai khala sabawm ai nai jeu kyh ba.
Amsi pajochi kamta kai ly nang i angvyn lawm i,
tanareichy awm khyh nai ne.
13 Kai dei iy tamo veng y rai khala, amo theu naira maidenreichy nga ai nai,
kai teng i dengdairei meimai hi pi veng ba.