SAM 37
Khumi aso y naichi hawi khumi kahawichi i khym taham note Hebrai cha lu: Davida i thui nai.
1 Khumi hawi y naichi i molam y paleung mawn u moh.
Sa tamang nai khumichi molam y paleung angai y nai awm moh.
2 Nichi ly jeirawm veng nai achachi kamta, kra y naimy tama u pawn ai.
Jei nawm nai keungchychi kamta, dei veng ai.
3 Areng ai ym naimy kahawi so ly
pri y chymme naimy awm ba.
4 Areng teng y amo theu naira hau;
hunaibaly mymy ly nang i ngai nai angym hai ai.
5 Nang ly nangmy ai Areng teng y a-au;
hunaibaly mymy ly nang ai ang sabawm ai.
6 Nang i hawi naira ai kanithun kani kangvang kamta, angvang phang hai ai.
7 Mymy i sa pi nai ai kham tanga naimy ajeng;
nang chawn nai khumichi molam py, khumi hawi y naichi i
katau eaung nai molam py, paleung bi moh.
8 Paleung mawn moh, kado theu moh;
paleung mawn nai hawi kado theu nai ly nang ai patangra naini pei ai.
9 Areng ai ym nai khumichi ly pri peang u ai.
Na i py khumi hawi y naichi ly pri pala nai avum u ai.
10 Neng kra y nai sala y khumi hawi y naichi ly tama pawn ai.
Nang ly nichi ai hau i py avum ai ny y.
11 Na i py paleung apanem nai khumichi ly pri peang ai i,Ref 37.11: Mt 5.5
tlamsa naira hawi chawn pa naira amtym u ai.
12 Khumi hawi y nai ly khumi kahawi ai, hawi y nai ka-dawn ly
niu ngai y nai paleung hawi khen aliki reng nai ne.
13 Na i py huni khumi ly kra y naimy phra ai bo, nanai
Areng my pany nai deaungkho y,
ni ai khen iy panui hai bo.
14 Khumi hawi y naichi ly ngari patang naichi ai padei ai nai py,
kateng sa nai khumichi ai tleh ai nai py,
haisauchi aphiu iy, thailihochi a-eaung u bo.
15 Na i py nichi ly mychi i haisauchi hawi naimy tleh nai avum ai.
Nichi i thailiho py tleu pawn ai.
16 Khumi kahawi leaungrei i vawnsai ateaung maidenrei ly
khumi hawi y naichi i nang chawn nai tleaung y vang teng keh.
17 Ati mana nai mo nabaly Areng ly khumi hawi y naichi i atho la pi veng iy,
khumi kahawichi ai ama hai ai nai deaungkho y ne.
18 Areng ly mymy i leu tangai naichi ai kry.
Nichi ly pri ai deungtasarei peang u ai.
19 Rai parai nai neng khala y nichi ly patang u ai ny y.
Cha nei takang nai neng khala y teicha teinei bym pa-rei nga u ai.
20 Khumi hawi y naichi ly dei u ai;
Areng ai paleung ka-e sa nai khumichi ly daichi kaseaung pauchi kamta tama u ai.
21 Khumi hawi y nai ly kalai la iy py, pe teang vai y.
Na i py khumi kahawi ly paawp y naimy pei reng.
22 Areng my amtheaung naira pei nai khumi ly pri amtym u ai.
Na i py mymy i amsawi lawi nai khumichi ly pri pala nai avum u ai.
23 Areng ly khumichi tako ai avo nai lam patei pi;
Mymy khrei nai khumichi ai ama hai bo.
24 Areng ly nichi ai sabawm pi ai i,
nichi ly atlym i py, ang thau y naimy awm ai ny y.
25 Vai i neng khala y kai ly miteaung acheang veng bo; kai ly saneng kakra kaheng bo.
Na i py khumi kahawi ai Areng my khai su nai py,
ni i cho chanauchi cheaung cha nai py, tlenrei py kaniu vai y leang.
26 Ni ly khumi takhrachi ai paawp y naimy, avawrei pei reng.
Ni i cho chanauchi py amtheaung naira nga u nai ne.
27 Hawi y nai ai en vui iy kahawi phai so;
hunaibaly nang i katu chanauchi ly pri y awm ai nai nga u jojo ai.
28 Ati mana nai mo nabaly Areng ly kahawi sa nai ai kawn iy,
mymy ai ka-ym awm nai khumichi ai khai su y nai deaungkho y ne.
Mymy ly nichi ai avawrei ama hai bo.
Na i py khumi hawi y naichi i kangpreangchi ly pri pala nai avum ai.
29 Khumi kahawichi ly pri amtym ai i,
hu y awm jo ai nai nga u ai.
30 Khumi kahawi ly tau cheng nai leu katheu reng;
ni ly adyh adawi jojo nai ne.
31 Ni ly my i Tameuh my leu pei nai ai paleung theung y pateung me bo.
Mana khala py huni leu pei naira i, angphri vui y leang.
32 Khumi hawi y nai ly khumi kahawi ai oh iy,
padei ai nai atho sa reng.
33 Na i py Areng ly khumi kahawi ai,
paleung ka-e i kiu y khai su ai ny y.
Ni ly tara jeung y tym iy, tara chih nai avum lawh baly, ni ai pajeng nai tym hai ai ny y.
34 Areng ai athang khai naimy reita leu pei naichi ai atyp ba.
Mymy ly nang ai pri amtym ai nai pei iy, tahm pasang ai..
Nang ly khumi hawi y naichi ai pri pala nai niu ai.
35 Kai ly kamjau kamteang sa reng nai khumi hawi y nai leaungrei ai niu vai bo.
Ni ly Lebanon daichi i saitleang keung kamta, khumi bawibawichi salo y khiu nai ne.
36 Na i py tlen pa-nyh katako prei nai khala ly ni ly huni meingtym y by y leang bo.
Ni ai hau i py niu pajau y leang bo.
37 Khumi kahawi ai khen cham; leu meitang teaung nai khumi ai khen paryp cham;
tlamsa naira nga nai khumi ly katu chanau deung akai nai ne.
38 Na i py kamngo sa nai khumichi ly tama bebe bo.
Ni i katu chanau kangpreangchi py, myh kang naira avum u ai.
39 Areng ly khumi meitangchi ai atleu bo.
Patang nairachi avum nai khala, nichi ai ama nai ne.
40 Mymy ly nichi ai sabawm iy atleu bo.
Nichi ly mymy teng y abyh u nai ne i,
mymy ly nichi ai khumi hawi y naichi kiu i nai atleu bo.