SAM 34
Ref 34 : 1 Sam 21:13-15.Tameuh i hawi naira ai palo nainote Hebrai cha lu: Davida ly samrang Abimelek mo y kamthu amlawn nai deaungkho y, paryh vui nai bo y thui nai sam ne.
1 Kai ly Areng ai palo jojo ai.
Mymy ai neng tleirei palo ai.
2 Kai ly mymy i sa nai leaungsaichi molam y mymy ai palo ai;
Ana naira avum nai khumi bawibawichi ly thai iy, amo theu u sy.
3 Areng i nang parai nai ai, kai hawi vanrei aeu u;
achi ly mymy i amyn vanrei palo u sina.
4 Kai ly Areng teng y chiu sa nai khala, mymy ly tangai pi bo.
Jei ai hawi parai naichira i nai kai ai atleu bo.
5 Ana naira avum nai khumichi ly mymy ai angdeang iy amo theu bo.
Nichi ly mana khala py, paleung phra u ai ny y.
6 Jeaungmang nai khumichi ly mymy ai palau u nai khala,
mymy pathang pi iy, nichi ai ngari kamtangchira i nai atleu bo.
7 Areng ai jei kaji nai khumichi ai,
mymy i kani pri amtaw thau my kry iy, ka-jeira i nai atleu bo.
8 Areng ly mana tanrei hawi na mo,
ai nangmy naimy hau ba.Ref 34.8: 1 Pet 2.3
Mymy teng y chymme naimy awm ai nga nai khumi ly taham hawi.
9 Mymy i khumi bawibawichi awi, Areng ai tahm khai u;
Mymy i leu tangai nai khumichi ly takang u ai ny y.
10 Khrangsichi malawn py, teicha avaw iy kajeu alam u ai.
Na i py Areng i leu tangai nai khumichi ly hawi naira sai sairei py takang u ai ny y.
11 Deaungdi ahawichi awi, kai teng y jeu iy kai i leu tangai u;
Areng ai tahm khai thai ai nai, nangchi ai kaimy kang patiu pi ai.
12 Nangchi ly amo theu naimy awm ai nai ngai u a?Ref 34.12-16: 1 Pet 3.10-12
Tlang heng nai hawi vanrei amo theu naira ngai u a?
13 Ngai u lawh baly chai y nai leu hawi,
ka-chawi leu thui u moh.
14 Hawi y nai ai en vui iy, hawi nai so u;
tlamsa naira nga ai nai ham parai naimy atho so u.
15 Areng ly khumi kahawichi ai kry iy,
nichi i aeu nai raawi pathang pi bo.
16 Na i py hawi y sa nai khumichi ly dei nai khala, kra y naimy
nichi ai tami pawn ai nai, mymy ly nichi ai ka-awi sa nai ne.
17 Khumi kahawichi ly mymy ai palau u nai khala y,
mymy ly pathang pi iy, ngari kamtangchira i nai atleu pi bo.
18 Areng ly paleung phra nai khumichi sahawi y awm.
Athang khai naira pipi by y naichi ai atleu pi bo.
19 Khumi kahawi ly ngari kamtang neangneang avum reng;
na i py Areng ly ni ai, huni ngari kamtangchira i nai atleu pi nai ne.
20 Areng ly ni i hengra ai kry nai ne.Ref 34.20: Jh 19.36
Ni i hiu harei malawn py tleu y ai.
21 Khumi hawi y naichi ly mychi i kamngo nai molam y dei u ai.
Khumi kahawi ai niu ngai y nai khumichi ly kamngo pajengra avum u ai.
22 Areng ly mymy i khumichi ai atleu ai;
mymy teng y abyh ai nai ahihawi nai khumichi ly kamngo pajeng naira lawi u ai.