SAM 33
Palo nai khulym
1 Aw khumi kahawi bawibawichi awi,
nangchi ly Areng my sa pi nai leaungsaichi molam y amo theu naimy aeu u.
Mymy i leu tangai nai khumi bawibawichi awi, mymy ai ly palo u.
2 Tarochi beu iy Areng ai palo u.
Vui horei awm nai katyn kapau hawi, mymy i mo y khulym thui u.
3 Mymy i mo y khulym kangtha thui u;
katyn hawi parai naimy taro beu u; amo theu parai naimy aeu u!
4 Areng i leu ly teng parai;
mymy i sa nai kalopchi py, leu meitang hawi amlau nai ne.
5 Areng ly meitang naimy tara chih nai ai khei nai ne.
Mymy i khaw parai nai tamen naira ly khaileaung pri y khiu bo.
6 Areng ly mymy i leu pei nai hawimy kani khusang ai py,
mymy i leu hawimy kani, lo, ka-si taukichi ai py sa nai ne.
7 Pangli ngiereichi ai meingtym hareira y achu hai bo.
Thiu parai nai suida pangli tuichi ai, khaira takunchira y kry me bo.
8 Khaileaung pri khumi bawibawichi awi, Areng ai tahm khai u!
Khaileaung pri y awm nai khumi bawibawichi awi,
mymy ai jei naimy tahm khai u!
9 Mymy leu pei nai khala y khaileaung pri lawm bo.
Mymy leu pei nai khala y ati cheaungkhangchi ly amteng nai ne.
10 Areng ly khumi cheng cheaungkhangchi i dawn nairachi phra hai bo.
Nichi i dawn tau naichi ai py, amcheang hai y ai nai paka vui nai ne.
11 Na i py mymy i dawn nai saichi ly mana khala py phra ai ny y.
Mymy i patyp nai saichi ly deungtasarei eaung nai ne.
12 Areng ai Tameuh palawn iy chiu nai khumi cheng ly taham hawi;
Mymy i khumi lawm ai nai vawi takhra nai khumichi ly taham hawi.
13 Areng ly kani pri mang dengdairei khen kathiu iy,
khumi bawibawichi ai niu bo.
14 Mymy ly my i peang nai meingtym i dengdairei meung iy,
khaileaung pri y awm nai, heng nai bawibawichi ai khen nai ne.
15 Mymy ly nichi i paleungchi ai sa nai keung ne nai deaungkho y,
nichi i dawn nai leaungsai ngiereichi ai pany.
16 Samrang napi nai ly my i tavaimi kamkawm pui deaungkho y, tavai eaung nai ny y;
Tavaimi risa py my i atho haiho molam y eaung nai ny y.
17 Tavai keaungngochi ly eaung naira nga nai deaungkho y ati sai py ny y.
Nichi i atho len nai py atleu pajau y leang.
18 Areng ly mymy ai jei kaji nai hawi
khaw parai nai tamen naira ai ym nai khumichi ai kry nai ne.
19 Mymy ly nichi ai deira i nai atleu bo.
Cha nei takang nai neng khala y, nichi ai heng ai nai pei bo.
20 Achi ly Areng ai ajeng u bo.
Mymy ly achi ai sabawm iy, ang kry nai ne.
21 Achi ly mymy deaungkho y amo theu u nai ne.
Achi ly mymy i amyn kachai ai ym u bo.
22 Aw Areng, nang ai kaichi my ajeng nai ne i,
kaichi teng y khaw parai nai tamen naira pei kyh ba.