SAM 35
Kasabawmra nga ai nai chiu sa nainote Hebrai cha lu: Davida i thui nai.
1 Aw Areng, kai ai ka-awi sa nai khumichi ai ka-awi so teang ly
kaichi ai tiu nai khumichi ai tiu teang ba!
2 Nang i khupui hawi tavai ateaung syn iy,
kai ai sabawm ai nai jeu kyh ba.
3 Kai ai patiu ai hau nai khumichi ai,
tivi hawi atiu pheu iy paka pi kyh ba.
Nang ly atleu pi ai, nanai kai teng y leu adeu pi bo.
4 Kai ai padei ai nai atho sa nai khumichi ly
sum naimy kangji ngo u sy!
Kai ai ka-jeira tym hai ai nai tau nai khumichi ly
anaw u iy ahei u phro sy!
5 Areng i kani pri amtaw thau naimy ly nichi ai patiu ai nai hui nai deaungkho y,
nichi ly ali my hm naira y ahei phro reng nai, choh ali kamta lawm u sy!
6 Areng i kani pri amtaw thai naimy ly nichi ai patiu ai nai preang nai thym khala,
nichi i angpreng nai lam ly vengpam nai y athei u sy!
7 Nichi ly atyhtyh naimy kai i vui deaung pateung iy,
kai ai patiu ai nai angawm kathiu tai u bo.
8 Na i py nichi ly athang khai y naimy tama u pawn ai.
Mychi pateung yb nai deaungra y man u ali teang ai i,
mychi tai nai angawm theung y tla iy phra u ai!
9 Huna nai khala kai ly Areng ai ka-ym iy amo theu ai.
Mymy ly kai ai atleu nai deaungkho y, kai ly amo theu ai.
10 “Nang hawi ami atawm mo? Ami nai ly nang kamta,
atho di nai khumi ai atho awm nai khumi my patang hai naira i nai py,
ngari kamtang avum nai khumi ai ana nai khumi teng i nai py, ami my ama hai mo,” nanai
Areng teng y kaimy i avum nai ka-dawn hawimy amti pi ai.
11 Khumi hawi y naichi ly kai tamang vai y nai
kamngochi hawi kai ai ang neng hai bo.
12 Nichi ly kai ai kahawi palawn u y bo.
Hunai deaungkho y kai ly khri pa-rei paleung phra nai ne.
13 Kaimy ly nichi no patang u nai khala, paleung si nai ka-dawn hawimy,
paleung apanem nai tarawi y chiu sa i,
paisiu amchiu iy, biu hai naimy kaawm bo.
14 Kai ly kaimy i ahawi, ti y baly amjo amnau i vui y chiu kasa nai kamta,
paleung apei parai naimy nichi i vui py, chiu kasa pi nai bo.
Kai ly kaimy i amhm i vui paleung mawn nai kamta, chiu kasa pi nai ne.
15 Na i py kai patang nai neng khala y, nichi bawibawi ly amo theu u i,
kai ai panui hai ai nai jeu u achu bo.
Kai pany y nai khumichi ly kai ai ang pakhau u;
anawn y naimy pakhau u bo.
16 Kai ai no-ei pa-rei panui hai u;
niu ngai y i, kai ai khen u ripati na bo.
17 Aw Areng, nang ly mana tanrei khen veangveang ai mo?
Nichi my tiu naira i nai, kai ai atleu kyh ba.
Hini khrangsichi teng i nai, kai i tlang ai atleu kyh ba.
18 Huna nai khala kai ly nang i khumichi achu naira y,
ngai kawn naimy palo ai.
humi mipuichi mo y nang ai kang palo ai.
19 Kai i paleung ka-e, khumi katapawpchi i sum nai molam y,Ref 35.19: Sam 69.4; Jh 15.25
paleung ateng hai ai nai pei pi moh.
Ati sai py ny y naimy kai ai niu ngai y nai khumichi ai ly
kai i paleung si nai molam y panui hai ai nai pei pi moh.
20 Nichi ly adyh adawi hai ai nai leu katheu y naimy,
adyh adawi ai ngai nai khumichi satang ai, tengtang y naimy phym iy thui u bo.
21 Nichi my, “Ha ha, nang i sa nai kaichi niu,”
nanai aeu iy, neng hai nai leu katheu u bo.
22 Na i py aw Areng, nang ly hini leaungsai pany nai ne.
Na i py aw Areng, awm pypy veng moh ba.
Kai hawi kamlo parai naira y awm pi veng moh kyh ba!
23 Aw Areng, kai i Tameuh, ang thau iy
kai i hawi nai satang chih pi kyh ba.
24 Aw Areng, nang ly adyh adawi nai keung ne nai deaungkho y,
kai teng y kamngo by y nai satang ahei hai kyh ba.
Kai i paleung ka-echi ai kai i satang molam y, paleung amo theu ai nai pei moh kyh ba.
25 “Achi i kangai angym bo,
ni ai achi my pajau bo!,”
nanai nichi thui pajau ai nai pei moh ba.
26 Kai i patang nai molam y paleung amo theu nai khumichi ly
khri pa-rei sum iy, ahei u phro na sy.
Mymychi ai kai tleaung y hawi keh, nanai
thui nai khumichi ly kangji nga iy meimai phra u na sy.
27 Kai ai tlamsa naira nga hai ai nai ngai nai khumichi ly
amo theu naimy, “Areng ly nang parai nai ne!
mymy i miseaung nang nai ly atho kanga bo,”
nanai avawvawrei aeu u sy.
28 Huna nai khala y kai ly nang i adyh adawi hai nai sai amthang hai ai.
Kani khengrei nang ai kang palo ai.