SAM 25
Lam patei pi ai nai hawi ama hai ai nai chiu sa nainote Hebrai cha lu: Davida i thui nai.
1 Aw Areng, kai ly nang teng y chiu kang sa.
2 Kai i Tameuh, kai ly nang ai kang ym bo.
Tavai sum iy kangji nga naira i nai kai ai atleu ba.
Kai ly sum nai deaungkho y,
paleung ka-echi ai paleung amo theu ai nai pei moh.
3 Nang ai ym nai khumichi ly sum naira avum u y ai.
Nang ai tiu ai nai panga y naichi naini sum u ai.
4 Aw Areng, nang i reita lamchi kai ai patiu pi kyh ba.
Hunichi ly kai ai pany hai pi kyh ba.
5 Nang ly kai ai atleu nai Tameuh ne nai deaungkho y,
nang i leu meitang kamta sa iy teaung thai ai nai kai ai patiu pi kyh ba.
Kai ly nang ai ym jojo nai ne.
6 Aw Areng, jangni i dengdairei nangmy patei pi nai pahen naira hawi
khaw parai nai tamen nairachi pany pi jo kyh ba.
7 Hawi thym hawisai thym khala y kai i sa tamang nai kamngochi hawi,
kateng so y naichi ai pahen kyh ba.
Nang ly khaw parai nai tamen naira awm iy, neaung hawi nai sai molam y, kai ai pany jo kyh ba.
8 Areng ly neaung hawi nai deaungkho y,
kamngo sa tamang nai khumichi ai, tako ai avo nai lam patei pi bo.
9 Paleung apanem nai khumichi ai lam kateng mang y pahawi iy,
nang i kangai patiu pi kyh ba.
10 Leu Maikawm hawi Reita leu pei naichi atyp nai khumi bawibawichi ai
nang ly tamen naira hawi py, ka-ym awm naira hawi py, lam patei nai ne.
11 Aw Areng, kai i kamngochi ly nawi parai.
Hunai deaungkho y nangmy i adeu nai khaw hai iy,
kai i kamngochi pahen pi kyh ba.
12 Areng ai jei kaji naimy tahm khai nai khumichi ly
mychi tako ai nai lam Tameuh teng i dengdairei amtiu u ai.
13 Nichi ly nang chawn u jojo ai i,
nichi i cho chanauchi py pri amtym u ai.
14 Areng ly mymy i leu tangai nai khumichi hawi amkawm nai ne.
Nichi i vui mymy i Leu Maikawm ai khaw hai bo.
15 Kai ly kasabawmra nga ai nai Areng ai neng tleirei angdeang bo.
Mymy ly kai ai ka-jeira i nai atleu bo.
16 Aw Areng, kai ly bengtlairei khyh nai y atho di nai ne.
Hunai deaungkho y kai mang y motha iy pahen kyh ba.
17 Kai i paleung bi naira bawibawi rym hai iy,
kai ai ngari kamtang bawibawira i nai atleu kyh ba.
18 Kai i avum nai rai nairachi hawi patang nairachi pany pi iy,
kai i kamngochi pahen pi kyh ba.
19 Kai teng y mana tanrei paleung ka-echi nawi na mo, nanai khen pi kyh ba.
Nichi ly kai ai mana tanrei niu ngai y na mo, nanai pany pi kyh ba.
20 Kai ai amo hai ly atleu kyh ba.
Kai ly nang teng y abyh ai nai ahihawi bo.
Hunai deaungkho y kai ai kangji ngo hai moh kyh ba.
21 Kai ly nang ai ym nai ne i,
kai i ka-ym awm nai ly kai ai kry hai sy.
22 Aw Tameuh, nang i khumi Israelachi ai
ngari kamtang bawibawira i nai atleu pi kyh ba.