SAM 26
Khumi kahawi i chiu sa nainote Hebrai cha lu: Davida i thui nai.
1 Aw Areng, kai ly kateng sa iy
nang ai paleung hawi verei ym nai khumi ne.
Hunai deaungkho y kai teng y kamngo by y, nanai thai hai pi ba.
2 Aw Areng, kai ai cham ly chih ba.
Kai i ngai naichi hawi paleung ka-dawnchi ai cham ba.
3 Kai ai nang i khaw parai nai tamen naira my lam patei bo.
Nang i ka-ym awm nai my ly kai ai ang pahawi jojo.
4 Kai ly khumi kamlaichi hawi amkawm y;
khumi kahawi amlawn naichi hawi, mana mo i py amkawm y ai.
5 Khumi kamngochi hawi amkawm naichi ai kaniu ngai y i,
khumi hawi y naichi ai ly kaen vui nai ne.
6 Aw Areng, kai teng y kamngo by y nai sai patei ai nai
kai ly kaimy i kiu asipan chum baly, nang i maicham taki iy chiu ai.
7 Kai ly kawn nai khulym thui iy,
nang i sa nai lyh ai hawi parai nai leaungsaichi ai thui nai ne.
8 Aw Areng, kai ly nang parai nai meingtym, napi nai
nang i awm nai yhm y ngai parai bo.
9 Kai ai kamngo sa nai khumichi hawi vanrei taphra moh kyh ba.
Khumi ai padei naichi i taham kasi avum hai moh kyh ba.
10 Huni khumichi ly hawi y naira avawrei sa iy,
un la ai nai awm yb jojo nai khumichi ne.
11 Kai ly kahawi sa nai ne.
kai ai pahen iy atleu kyh ba.
12 Kai ly ka-jeira cheaungkhang i nai lawira nga i, chymme naimy awm bo.
Khumi mipuichi sala y Areng ai kapalo ai.