SAM 21
Tavai eaung nai molam palo nainote Hebrai cha lu: Davida i thui nai Sam.
1 Aw Areng, nang ly samrang teng y atho haiho pei nai deaungkho y ni ly amo theu;
nang ly tavai eaung hai nai deaungkho y,
ni ly khri pa-rei amo theu bo.
2 Nang ly ni i kadeaung nai pei pi;
ni i chiu sa nai pathang pi bo.
3 Nang ly ni ai amtheaung naira kahawichi pei pi.
Ni ai muku lukhym amym hai bo.
4 Ni ly hengra hnei i, nang ly ni ai hengra pei nai khyh chang y,
deungtasa hengra py pei pi nai ne.
5 Nangmy sabawm nai deaungkho y,
samrang ly sa thai naira angvang na.
Nang ly ni ai amthang leaung ai nai hawi, apu parai naira pei pi bo.
6 Nang i amtheaung nairachi ly ni i tlang tleaung y avawrei tym hai bo.
Nang ly ni i sahawi y awm nai deaungkho y, ni ly amo theu nai ne.
7 Samrang ly ati cheaungkhang sa thai nai Areng ai ym nai ne.
Areng i khaw parai naimy tamen nai saho y
ni ly chymme ai.
8 Samrang ly my i paleung ka-e bawibawichi ai patiu ai.
Mymy ai niu ngai y nai khumi bawibawichi ai patiu pawn ai.
9 Mymy ang jeu nai khala angveaung nai mai kadeu kamta,
Areng ly kado theu iy nichi ai taphra pawn ai;
nichi ly mai y kang be ai.
10 Samrang ly nichi i cho chanau bawibawichi ai padei ai.
Nichi i cheng bawibawichi ai tamyh pawn ai.
11 Nichi ly samrang ai padei ai nai hawi y nai ka-dawnchi sa u.
Na i py eaung ai ny y.
12 Ni ly thailiho hawi ko i,
nichi ly anaw iy ang preng hai ai.
13 Aw Areng, nang ly sa thai naira phum-ang awm nai deaungkho y, nang ai kaichi my kang palo u bo!
Nang i nang parai nai ai palo nai khulym thui ai.