SAM 19
Tameuh i sa nai hawi nang parai nai sainote Hebrai cha lu: Davida i thui nai Sam.
1 Kani khusang ly Tameuh i nang parai nai sai amteng hai!
Kani khusang ly mymy i kupe lasachi amny hai!
2 Hini satang ai kani y kanirei,
vum y vumrei thai hai pateang bo.
3 Labeaung mang py leu katheu y, sailang py amny y,
raawi py tyn y teu i py,
4 kani hawi vum y theu nai katyn ly khaileaung pri verei y ahei i,Ref 19.4: Rom 10.18
hunichi my ahei nai leu ly khaileaung pri katem y khrairei tym bo.
Tameuh ly kanito i vui y, kani khusangra y yhm harei sa nai ne.
5 Mymy i yhm takun theung mang dengdairei theu nai aju palyn nai keung kamta py,
angpreng acham ai nai ngai kasada nai angpreng nai keung kamta py, kanito ly theu lup na bo.
6 Ni ly kani khusang kachawn mang dengdairei amteng iy,
takhra kachawn mang y taki nai ne.
Ni i bi nai ly ati sai py kham pajau y.
Areng i leu pei nai
7 Areng i leu ly angym be pa-rei hawi nai deaungkho y,
paleung hawi phailo ai kangtha lawm hai reng nai ne.
Areng i patiu pi nai saichi ly ym ai hawi parai nai ne i,
pany thai y naichi ai pany hai bo.
8 Areng i reita leaungsaichi ly teng parai nai ne i,
tangai nai khumichi i paleung y amo theu hai reng.
Areng i reita leu pei naichi ly leu meitang ne i,
paleung y cheng naira pei reng nai ne.
9 Areng ai jei kaji naimy tahm khai nai ly hawi parai nai ne i,
deungtasarei khaw jojo ai.
Areng i tara chih nai sai y teng parai nai ne i,
deungtasarei adyh adawi nai ne.
10 Hunichi ly muku tleaung y hawi, hawi keh nai muku tleaung y py khrei ai nai hawi parai.
Hunichi ly hawi keh nai khawi hang tleaung y py tui keh.
11 Mymy i miseaung kai teng y huni tara chih nai saichi my pany thai ai nai pei.
Kai ly hunichi ai tangai nai ne i, hawi nairachi kanga bo.
12 Amimi py amy i tamang naichi ly niu pajau y;
Aw Areng, amny pajau y nai kamngochira i nai, kai ai chai hai kyh ba!
13 Sa ta-li nai kamngochira i nai py chai hai kyh ba.
Huni sa tamang naichi ly kai ai peang moh sy.
Huna nai khala naini kai ly
kamngo by y ai i, kamngo so bi y ai.
14 Kai i abyhra ne iy kai ai atleu nai keung,
aw Areng, kai i katheu nai leuchi hawi, paleung ka-dawnchi ly nang i kangai ne sy!