SAM 17
Kamngo by y nai leaungrei i chiu sa nainote Hebrai cha lu: Davida i chiu sa nai.
1 Aw Areng, adyh adawi ai nai molam y,
kai i takeng nai tangai pi kyh ba.
Kasabawmra nga ai nai kai i aeu nai raawi dawn pi patyp kyh ba!
Kai ly neaung hawi parai naimy hnei takeng nai ne i, kai i chiu sa nai tangai pi kyh ba.
2 Nang ly kateng lam pany nai deaungkho y,
kai i hawi ai nai molam y tara chih pi kyh ba.
3 Nang ly kai i paleung pany;
vum y kai teng jeu iy
kai i paleung awm nai sai hawihai palai cham nai khala,
hawi y nai sai niu y.
4 Kai ly khumi takhrachi kamta, chai y nai leu katheu y;
nang i reita leu tangai nai ne.
Ta-li ta-phang sa nai lam mang y py abang y nai ne.
5 Nang i lam naini tako nai ne;
huni lam i nai amphri vai y leang.
6 Aw Tameuh, nang ly pathang pi reng nai deaungkho y, kai ly nang teng y chiu kang sa;
hunai deaungkho y kai mang y hi iy, kai i chiu sa nai raawichi tangai pi kyh ba.
7 Nang i lyh ai hawi parai nai tamen naira amteng hai iy, kai ai atleu kyh ba;
nang i sahawi y kai ly paleung ka-echi my patang hai naira i nai, law tleaung naira nga bo.
8 Nangmy i meicho kangvai kamta kai ai kry kyh ba.
Khumi hawi y naichi my tiu naira i nai kai ai
9 nang i pakhi ka-khui anui y khiu me ba.
Kai ai padei ai hau nai paleung ka-echi ly kai ai katan u meuh bo.
10 Nichi ly pahen nai paleung by y naimy, amlyh am-e nai leu katheu u.
11 Nichi ly kai i chei naira tleirei y kai ai atlym pa-rei
tapheu ai nai katanmeuh iy ajeng u.
12 Nichi ly khrangsichi kamta,
kai ai angtheng piupa ai nai ngai u i,
kai ai ajeng u rym paryp bo.
13 Aw Areng, jeu ba! kai i paleung ka-echi ai neaung vui iy, taphra pi pawn ba!
Nang i haisau hawi, khumi hawi y naichi kiu i nai kai ai atleu pi kyh ba.
14 Vai, heng nai deung y ngai nai kamta angym nai khumichi kiu i nai kai ai atleu kyh ba.
Nichi i vui y nangmy pateung pi achu nai ngari kamtang hawimy, nichi ai pajeng kyh ba.
Huni ngari kamtangchi ai nichi i cho chanauchi teng khyh chang y naimy,
nichi i katu chanauchi ai py avum hai ba.
15 Kai ly kamngo so y nai deaungkho y nang ai niu ai; kai ly ira i nai ang thau nai khala,
nang ly kai hawi vanrei awm nai deaungkho y, amo theu naira nga ai.