SAM 148
Tameuh ai palo ai nai kani khaileaung verei ai palau nai
Salo asang kehra awm naichi awi,
kani mang dengdairei Areng ai palo u.
2 Kani pri amtaw thau nai bawibawichi hawi
kani pri tavailu bawibawichi awi, mymy ai ly palo u.
3 Kanito hawi lo awi, mymy ai palo u;
angvang nai ka-si taukichi awi, mymy ai palo u.
4 Salo keh hawi kani khusang i tuichi awi,
5 Huni atiti bawibawichi ly Areng i amyn palo u sy!
Mymy ly leu pei iy hunichi ai sa nai ne.
6 Mymy i leu pei nai kamta, hunichi ly
mymychi i avo nai meingtymchira y awm jojo nai ne;
hunichi ly leu pei nai akhi pajau y.
7 Pavui nakachi hawi, pangli thiu parai naira y awm nai bawibawichi awi,
amlosadichi hawi ji akawichi awi,
8 kani amai hawi khupanymchi awi, mymy i leu tangai nai ali kamchaichi awi,
khaileaung mang dengdairei Areng ai palo u.
9 Mawichi hawi mawi aheungchi awi,
thengthai keungchi hawi thengreungchi awi,
10 amso mawi kamrawi hawi amso mawi kasichi awi,
ava thai nai heng nai amjy hawi tavochi awi, mymy ai palo u.
11 Samrangchi hawi khumi bawibawichi awi,
samrang i cho chanauchi hawi peang nai keung bawibawichi awi,
12 thawndeangchi hawi anglochi awi,
miteaungchi hawi deaungdichi awi, mymy ai palo u.
13 Hunichi ly Areng i amyn palo u sy!
Mymy i amyn ly amyn awm nai ngiereichi theung y len keh nai ne;
mymy i nang parai nai sai py, khaileaung hawi kani salo y awm.
14 Mymy ly mymy i khumichi hawi, mymy i tamen keh nai
Israela chengchi teng y khri pa-rei atho awm hai nai deaungkho y,
huni khumichi ly mymy ai palo u bo.
Areng ai palo u!