SAM 147
Ati cheaungkhang sa thai nai Tameuh ai palo nai
Achi i Tameuh ai palo nai khulym thui nai ly khri pa-rei hawi parai;
mymy ai palo nai ly teng parai i, amlau keh nai ne.
2 Areng ly Jerusalem mary ai sa palum teang iy,
pri takhra y awm u nai Israela chengchi ai palau ali teang bo.
3 Mymy ly paleung phra naichi ai paleung awm hai nem iy,
nichi i tamokalemchi ai bam pi typ nai ne.
4 Mymy ly ka-si taukichi ai kati patyp iy,
ka-si ha hareichi ai amyn pathi bo.
5 Achi i Areng ly nang parai iy sa thai naira angym nai ne;
mymy i cheng naira ai saju angka pata ai nai ngo y.
6 Mymy ly tahm anem nai khumichi ai tahm pasang iy,
khumi aso y naichi ai ly khaileaung y tym pa-rei atlym hai bo.
7 Palo nai khulymchi thui iy Areng ai palo u;
taro beu nai katyn hawi, achi i Tameuh ai palo u.
8 Mymy ly kani mang y khupanymchi hawi khiu;
khaileaung y kani nai hai iy,
mawichira y achachi prau hai bo.
9 Mymy ly amso tawnbawichi ai teicha teinei pei pi;
o-a chochi hang nai khala y pacho panei bo.
10 Mymy ly atho awm parai nai keaungngochi ai py,
sorai paleung awm nai tavaimichi ai py, aly ngai nai ny y leang.
11 Na i py mymy ai jei naimy tahm khai naichi,
khaw parai nai tamen naira ai ym nai khumichi ai aly ngai nai ne.
12 Aw Jerusalem mary, Areng ai palo!
Aw Zion mary, nang i Tameuh ai ly palo!
13 Mymy ly nang i mary apai katheu ai khaw hai iy,
nang i mary khumichi ai amtheaung naira pei bo.
14 Mymy ly nang i mary apai katheu ai chymme pa-rei khai iy,
nang ai hawi keh nai chohpui chamaw hawi paleung tuinem hai ai.
15 Mymy ly khaileaung ai leu pei;
huni leu pei nai kamta tym ryp bo.
16 Mymy ly beram mui kamta thokhe nanai ji amaichi tla hai iy,
maiphudei kamta kadam amaichi tla hai bo.
17 Mymy ly kani amaichi ai lengseaungdeichi kamta tla hai bo;
mymy i pato nai kasavai ly ami py kham pajau y na!
18 Hunaibaly mymy ly leu pei nai deaungkho y, tuikhichi ly tlawn veng na;
ali ai aho hai nai deaungkho y, tui ly leaung na bo.
19 Mymy ly mymy i leu ai mymy i khumichi teng y py,
reita leaungsai hawi reita leu pei naichi ai Israela teng y py, pei pi nai ne.
20 Mymy ly cheng takhrachi i vui, hina nai kamta so pi y leang;
nichi ly mymy i reita leu ai pany u y.
Areng ai palo u!