SAM 146
Atleu keung Tameuh ai palo nai
1 Areng ai palo!
Aw kai phailo, Areng ai palo!
2 Kai ly heng nai ryrei mymy ai palo ai;
kaimy deungrei ly kai i Tameuh ai palo nai khulym thui ai.
3 Khumichi i lu sa nai keungchi ai ym u moh;
mani khumicho ly nangchi ai atleu pajau y leang.
4 Nichi ly dei nai khala y khaileaung y vawi u ai i,
huni kani y my nichi i katau ly tama nai ne.
5 Jakob i Tameuh my sabawm naira nga nai khumi,
my i Areng Tameuh ai ym nai khumi ly taham hawi.
6 Mymy ly kani, khaileaung, pangli hawi vanrei, Ref 146.6: Amt 4.24, 14.15
hunichi bawibawi ai sa nai ne.
Mymy i ka-ym awm nai ai ly kry jojo.
7 Mymy ly ana naira avum nai khumichi ai meimai khen iy tara chih pi i,
kajeu alam naichi ai pacho panei pi bo.
Areng ly theaung tla naichi ai lawi hai iy, mei kamjuchi ai mei angvang hai.
8 Atlym nai khumi bawibawichi ai pathau ali teang bo;
mymy ly khumi kahawichi ai tamen nai ne.
9 Mymy ly Israela pri y awm nai cheng takhrachi ai ama hai iy,
neampachy lumaichi hawi nurochochi ai sabawm;
na i py khumi aso y naichi ai ly tama hai bo.
10 Areng ly deungtasarei samrang lawn ai.
Aw Zion mary, nang i Tameuh ly deungtasarei peang ai.
Areng ai palo u!