SAM 143
Kasabawmra nga ai nai chiu sa nainote Hebrai cha lu Davida i thui nai Sam.
1 Aw Areng, kai i chiu sa nai tangai pi kyh ba!
Nang ly neaung hawi parai nai deaungkho y, kai i takeng nai pathang pi kyh ba;
nang ly ka-ym awm nai deaungkho y, kai i hnei takeng nai tangai pi kyh ba.
2 Nang i miseaung kai hawi ka-jo ka-thui awm moh sy ba;Ref 143.2: Rom 3.20; Kal 2.16
nang i mo y kamngo chai nai leaungrei py by y.
3 Paleung ka-e ly kai ai ang hui i, ang kai;
kai ai sum hai be bo.
Ni ly kai ai kaveng theung y ang paeung cheng iy,
kai ly jangni khala y dei chum nai khumi kamta lawm bo.
4 Hunai deaungkho y kai ly kasum pei ai nai angchi yb bo;
khri pa-rei paleung phra atho di na bo.
5 Kai ly lawm veng nai neng kanichi ai tami pajau y;
kai ly nang i sa nai ngiereichi ai dawn pasym bo;
nang i sa nai kuchi bawibawichi ai py dawn pasym nai ne.
6 Kai ly kiu pheu naimy nang teng y chiu sa bo;
tui ahai nai khaileaung kamta, kai i phailo ly nang ai kadeaung nai ne.
7 Aw Areng, vaimy kai i hnei takeng nai pathang pi kyh ba!
Kai ly athang khai naira pipi by y na bo.
Kai ai meimai hi pi veng moh kyh ba;
meimai hi pi vui lawh baly kai ly tavau kho y chei nai khumi kamta lawn ai.
8 Nang i khaw parai nai tamen naira ly
kai ai khawn tleirei pany hai jo kyh ba; kai ly nang ai ym nai ne.
Kai i chiu sa nai nang teng y tym sy;
kai i tako ai nai lam patei pi kyh ba.
9 Aw Areng, nang teng y abyh ai nai kai ly ahihawi bo;
kai ai paleung ka-echi kiu i nai atleu kyh ba.
10 Nang ly kai i Tameuh ne;
nang i kangai sa ai nai kai ai patiu pi kyh ba.
Kai ai pahen parai naimy chymme naira lam patei kyh ba.
11 Aw Areng, nang i adeu nai kamta kai ai atleu kyh ba;
nang i neaung hawi naira hawimy, kai ai ngari kamtangra i nai atleu pi kyh ba.
12 Nang ly kai i tlang tleaung y tamen nai deaungkho y,
paleung ka-echi ai padei pawn kyh ba;
kai ly nang i miseaung ne nai deaungkho y,
kai ai ana nai khumi bawibawichi ai padei pawn ba.