SAM 144
Tavai eaung nai y samrang i Tameuh teng kawn nainote Hebrai cha lu Davida i thui nai.
1 Kai i lengseaung pui lawm nai Areng ai ly palo u!
Mymy ly kai ai tavai atiu ai nai ang patiu pi;
tavai thau nai sai py patiu pi nai ne.
2 Mymy ly kai ai ama hai nai kai i apai; kai i khengsi apai,
kai ai atleu keung, kai i abyhra khupui ne.
Mymy ly khumi cheng cheaungkhangchi ai
kai i kiu anui y tym hai bo.
3 Aw Areng, khumi ly ati mana nai khumi nai yRef 144.3: Job 7.17-18; Sam 8.4
nang ly ni ai tahm khai ai nai tla lawh mo?
Khumicho ly ati mana nai khumi nai y, nang ly ni ai dawn patyp ai nai tla lawh mo?
4 Khumi ly taho kathiu, taho kalau nai ali hawi atawm;
ni i heng nai ly tama veng reng nai pa-pui hawi atawm nai ne.
5 Aw Areng, kani khusang ai paeaung iy jeu kathiu ba;
mawichi ai teaung baly, hunichira i nai maikhyh theu ai.
6 Amlosadi theu hai iy nang i paleung ka-echi ai, ahei hai phro kyh ba;
nang i thailihochi hawi ko iy, nichi ai angpreng hai pawn ba.
7 Salo keh mang kiu jaha iy,
tui kathiura i nai kai ai atheu kalau ly atleu kyh ba;
cheng takhrachi kiu i nai kai ai atleu kyh ba.
8 Huni khumichi ly mana khala py leu kateng katheu u vai y;
vaineng tleang i malawn py, ka-chawi thui reng naichi ne.
9 Aw Tameuh, kai ly khulym kangtha thui iy nang ai kang palo ai;
taro beu iy khulym thui naimy palo ai.
10 Nang ly samrangchi ai tavai eaung ai nai pei pi;
nang i miseaung Davida ai atleu bo.
11 Pahyp y naimy ana nai paleung ka-echi teng i nai kai ai atleu pi kyh ba;
pri takhra khumichi kiu i nai atleu kyh ba;
huni khumichi ly mana khala py leu kateng katheu u vai y;
vaineng tleang i malawn py, ka-chawi thui u reng naichi ne.
12 Kaichi i chapochi ly thawndeang nai thym khala y,
keung cheangryh cheangryh nai keung dichychi kamta lawn sy.
Kaichi i chanauchi ly samrang i yhm takichira y ka-pu leng nai
lengseaung yhm mawnchi kamta lawn sy.
13 Kaichi i pai pateung naichi ly
amti amjang cheaungkhangchi kawi naimy awm sy.
Sui patlai nai angdym y awm nai beramchi ly
sang neangneang nawi nai beram chochi tapen sy.
14 Kaichi i sichi py kapawm ju nai hawi,
dei tama naichi by y naimy neangneang peung sy.
Kaichi i lam ly patang naira avum nai khumichi i
vo tangam nai raawichi awm moh sy.
15 Hina nai kamta awm nai pri ly taham hawi;
Areng ly Tameuh ne, nanai ym nai khumichi ly taham hawi.