SAM 127
Tameuh i hawi nai sai ai palo nainote Hebrai cha-lu: Solomon i thui nai.
1 Areng my yhm so pi y baly
sa nai keungchi i kalop ly atyhtyh teu;
Areng my mary typ pi y baly
tamcheaungchi i typ nai py atyhtyh teu.
2 Tlang heng ai nai i vui khawn angthodyh ang thau iy,
veng na nai pa-rei akawm parai naimy kalop sa nai py atyhtyh teu.
Ati mana nai mo nabaly Areng ly mymy i tamen nai khumichi
i nai thym khala, nichi i ngai nairachi pei pi nai deaungkho y ne.
3 Cho chanauchi ly Areng my pei nai langseaungchi ne;
nichi ly amtheaung hai naira tatangchi ne.
4 Hawi thym khala y nga nai cho chanauchi ly
tavailu i kiu y awm nai thailiho chynchi hawi atawm.
5 Hunai kamta thailiho chyn neangneang awm nai khumi ly taham hawi;
ni ly paleung ka-echi hawi tara chih nai jeung y
avum nai khala sum y ai.