SAM 102
Patang naira avum nai deaungdi leaungrei i chiu sa nainote Hebrai cha lu Akawm iy patangra avum nai khumi iAreng teng y tangam naimy chiu sa nai.\x*
1 Aw Areng, kai i chiu sa nai tangai pi kyh ba;
sabawm ai nai kai i aeu nai raawi tangai pi kyh ba!
2 Kai patang naira avum nai thym khala y,
meimai hi pi veng mo kyh ba!
Kaimy palau nai khala, tangai pi iy
pathang pi kaliki kyh ba!
3 Kai i heng nai deung ly maikhyh kamta tama vui ai i,
kai i tlang py mai kamta kang naimy awm ai.
4 Kai ly acha keung kamta pakhau piupa nai avum iy, jeirawm naimy awm ai;
kai ly teicha cha ai nai paleung by y na bo.
5 Kai ly tao pajeng parai naimy tangam bo;
kai teng y hiu hawi peih naini awm khyh bo.
6 Kai ly daichi ka-vym theung i tavo kamta py,
phra seaungkhrang nai yhm y awm nai beaungku kamta py lawm bo.
7 Kai ly i amhm y na bo; kai ly yhm amphu salo y
amairei chym khyh nai tavo hawi atawm nai ne.
8 Paleung ka-echi ly kai ai kani khengrei, khumi aniu y nai sa u bo;
nichi ly kai ai pata iy, pasawi patau u bo.
9-10 Nang i kado theu nai sai len parai nai molam y,
kai ly maidym ai teicha teinei palawn iy, cha ai nai tla bo;
kreip hang ai py kaimy i meikatui hawi katlen iy, nei ai nai tla bo.
Nang ly kai ai tahm pasang chum baly aphi su nai ne.
11 Kai i heng nai deung ly dym ka-khui kamta ne;
kai ly acha kamta jeirawm veng bo.
12 Na i py aw Areng, nang ly deungtasarei samrang ne;
nang i amyn ly deungtasarei awm jojo ai.
13 Nang ly ang thau iy Zion mary ai pahen ai;
huni mary ai pahen ai nai nang ly tym bo;
vai i neng ly avo khyp nai neng ne.
14 Nang i miseaungchi ly Zion mary phra veng teu i py,
huni mary ai khrei nai awm u asai rai;
Zion mary phra seaungkhrang veng teu i py,
huni mary ai pahen u asai nai ne.
15 Khumi bawibawichi ly Areng ai jei kaji naimy awm u ai;
khaileaung pri i samrang bawibawichi ly
nang i sa thai naira ai jei kaji naimy tahm khai u ai.
16 Areng my Zion mary palum teang nai khala ly
mymy i nang parai nai sai amteng hai ai.
17 Mymy ly mymy i khai su nai khumichi i hnei takeng nai thai iy,
nichi i hnei takeng nai tangai pi ai.
18 Areng i sa nai saichi ai deung kangthauchi i vui tajiu pi u typ;
hunai khala naini nichi ly nang ai palo u ai.
19 Theaungtla nai khumichi i tangam nai raawi tangai ai nai py,
dei ai nai pa-rei tara chih naira avum nai khumichi ai lawi naira pei ai nai py,
20 Areng ly salo ka-sang meingtym kachai mang dengdairei khen kathiu bo;
mymy ly kani pri mang dengdairei meung iy, khaileaung y khen patawm nai ne.
21 Hunai deaungkho y pri tleirei i khumi cheng cheaungkhangchi ly
angym u iy Areng ai chiu u nai khala y,
22 Zion mary salo y nang i amyn amthang hai ai;
Jerusalem mary y nang i nang parai nai palo u ai.
23 Kai deaungdichy khala i dengdairei, Areng ly kai ai atho di hai iy,
kai i heng nai deung py dawi hai bo.
24 Aw Tameuh, kai miteaung cheang y naimy,
kai ai lo vui moh kyh ba.
Aw Areng, nang ly heng jojo nai keung ne.
25 Nang ly jangni y khaileaung palum chum baly,Ref 102.25-27: Heb 1.10-12
nang i kiu hawi kani khusang ai sa bo.
26 Huni bawibawichi ly tama pawn teu i py, nang ly awm jojo ai nai ne;
huni bawibawichi ly ateaung kamta tangym pawm ai.
Nang ly ateaung atha nai kamta atha nai deaungkho y,
hunichi ly tama pawn ai.
27 Na i py nang ly mana khala py huna jojo;
nang i heng nai deung ly mana khala py tem vai ai ny y.
28 Kaichi i katu chanauchi ly tlamsa naimy awm u ai;
nichi i cheng theaungchi py, nang teng y abyh ai i,
chymme naimy awm u jo ai.