SAM 101
Samrang i adeu nai leunote Hebrai cha lu Davida i thui nai Sam.
1 Aw Areng, kai ly ka-ym awm naira hawi leu meitang satang khulym thui ai;
kai ly nang i mo y huni khulym thui ai.
2 Kai ly kamngo by y pa-rei kaawm ai.
Nang ly mana khala y kai teng jeu ai mo?
Kai ly kaimy i yhm y chai parai nai paleung ka-dawn hawi kaawm ai.
3 Hawi y naira ai ly mana khala py kham pi ai ny y.
Tameuh ai nithun thun vui nai khumichi i sa nai saichi ai, kai ly mei angai y;
kai ly hunichi hawi ati sai py, amtawn abi y ai.
4 Kai ly katapawp paleung ka-kawi awm ai ny y;
hawi y sa nai khumichi hawi py, amkawm ai ny y.
5 Khumi takhra i hawi y sa nai satang ai,
leu kamsyh y thui reng nai khumi ai ly nawi su veng ai;
amlyh am-e naimy
paleung asang nai khumi ai ly kham pi ai ny y.
6 Kai ly Tameuh y ka-ym awm nai khumichi ai ly paleung apei ai;
nichi ai kaimy i samrang yhm y awm ai nai kapei ai.
Katapawp paleung ka-kawi by y nai khumichi ai
7 Ka-chawi thui nai khumi ly kai i samrang yhm y awm ai nai ngo y ai;
khumi kahawi amlawn reng nai khumi ly kai i mo y awm ai nai ngo y ai.
8 Kaichi i pri y awm nai khumi aso y naichi ai ly,
kaimy kani tleirei tamyh vui ai;
Areng i mary pui i dengdairei,
khumi hawi y nai bawibawichi ai, kaimy patheu pawn ai.