SAM 103
Tameuh i tamen nairanote Hebrai cha lu Davida i thui nai.
1 Aw kai i phailo, Areng ai palo!
kai i tlang paleung phailochi awi, mymy i amyn kachai ai palo u!
2 Aw kai i phailo, Areng ai palo!
mymy i pahen nai saichi tami veng moh.
3 Mymy ly kai i kamngo bawibawichi palawi pi iy,
kai i no-na bawibawichi py, hawi ang sa pi nai ne.
4 Mymy ly kai ai deira i nai atleu iy,
tamen naira, pahen nairachi hawimy amtheaung hai bo.
5 Mymy ly kai ai amtheaung hai nai deaungkho y,
amhm pui kamta atho ham naimy awm bo.
6 Areng ly ana patang naira avum naichi mang y asa hai iy,
tara chih pi nai deaungkho y, nichi i nga ai avo naichi pei pi nai ne.
7 Mymy ly Mosi teng y mymy i dawn pasym yb naichi thui pi iy,
lyh ai awm nai saichi, Israela chengchi ai niu hai bo.
8 Areng ly tamen nai hawi pahen nai keung ne iy,Ref 103.8: Jak 5.11
paleung sau neaung hawi nai deaungkho y,
khaw parai nai tamen naira hawimy kawi angym nai ne.
9 Mymy ly sa tamang nai y avawrei jo preng y;
mymy ly kado theu jojo y leang.
10 Mymy ly achi ai kamngo pajeng ai nai ataing khyp teu i py,
pajeng naira tym hai y leang;
achi teng y kamngochi hawi tamang naichi awm nai kamta, pajeng pi y leang.
11 Khaileaung salo y awm nai kani khusang ly asang nai kamta,
mymy ai jei naimy tahm khai naichi i vui khai pi nai tamen naira ly len parai.
12 Nisi kangtem ly nidym kangtem hawi palo nai kamta,
mymy ly achi i kamngochi ai py, achi hawi palo hai veng bo.
13 Ampo ly chanauchi ai pahen nai kamta,
Areng ly mymy ai jei naimy tahm khai naichi ai pahen nai ne.
14 Mymy ly achi i tlang ai ati hawi sa nai mo, nanai pany;
achi ly spryh ne, nanai mymy ly pany.
15 Achi i heng nai ly acha kamta ne.
achi ly daichi kaseaung kamta, keung cheang iy pau angdai nai ne;
16 naibaly ali aho nai khala, pau ly vui ryp nai deaungkho y,
huni ai niu ali bi y leang bo.
17 Na i py Areng ai jei naimy tahm khai naichi i vui y,
mymy i tamen nai ly deungtasarei khaw jo nai ne.
18 Mymy i Leu Maikawm ai kry iy, Reita leu pei naichi ai ka-ym awm naimy
sa patawm naichi i tlang tleaung y, mymy i pahen naira ly
katu chanau khrairei tym nai ne.
19 Areng ly mymy i areng atehra ai kani mang y khai bo;
mymy ly khusang deaungdu ai peang nai ne.
20 Sa thai naira haiho len parai iy, mymy i leu pei naichi sa patawm nai,
mymy i leu tangai nai kani pri amtaw thauchi awi,
Areng ai palo u!
21 Mymy i ngai nai kamta sa pi nai miseaung,
kani pri amtaw thau bawibawichi awi, Areng ai palo u!
22 Areng i sa nai hawi peang naira theung y awm nai
heng nai amjy bawibawichi awi, mymy ai palo u.
Aw kai i phailo, Areng ai palo!