4
Cheng naira i kamranrachi
1 Deangchi awi, ngampo kai i patiu pi nai leu tangai u. Pany thai ai nai hawihai palai tangai u.
2 Kai i patiu pi naichi ly hawi nai deaungkho y, hunichi ai tami u moh.
3 Amhm ampo i chapo leaungrei khyh nai kai ly deaungdichy nai thym khala,
4 kai i ampo ly kai ai, “Nang ly kai i leu ai pateungme iy pany jo ba. Mana khala py tami moh. Kaimy kang thui pi nai kamta so; hunaibaly nang heng ai.
5 Cheng naira hawi pany thai praw nai cheng naira ai amtiu! Kai i thui nai leu tami moh; athang khai y naimy awm moh.
6 Cheng naira ai khai su moh; huni my ly nang ai ang kry ai. Cheng naira ai paleung bie ba. Huni my ly nang ai chymme hai ai.
7 Cheng naira ai amtiu manme ba; amtiu nai ngiereichi theung y, pany thai praw nai cheng naira ai amtiu patyp keh ai nai tla.
8 Cheng naira ai paleung abie ba. Huni my ly nang ai tahm asang hai ai. Cheng naira ai takawi na ba. Huni my ly nang ai tahm pateng hai ai.
9 Cheng naira ly nang i lu ai apu parai nai lupeu ajeng hai iy, nang parai nai areng lukhym amyn hai ai,” nanai kai ai patiu pi bo.
10 Deang awi, kai i leu tangai ba. Kai i thui nai leu ai tahm khai parai naimy dawn patyp ba. Hunaibaly nang heng sau ai.
11 Kai ly nang ai cheng naira kang patiu pi iy, kataw kateng heng ai nai lam kang patei pi ai.
12 Nang ly tau kacheng hawimy, nangmy i lam y tako baly, khrukhra naira ati sai py avum ai ny y. Nang angpreng nai khala py, pathuikhe iy avah ai ny y.
13 Nangmy i ngai nai cheng naira ai ly pany jo ba. Nang i ngai nai cheng naira ly nang i heng naira ne; huni ai ly hawihai kry ba.
14 Nang ly khumi hawi y naichi i, tako nai lam y tako moh. Khumi hawi y naichi i sa nai kamta amtiu moh.
15 Huni khumichi kamta so moh; hawi y nai ai ly amkyn! abang moh. Lam takhra mang y amphri vui.
16 Khumi hawi y naichi ly hawi y naichi so y baly i amhm y. Nichi ly khumi takhra ai patang hai y baly i thai y.
17 Hawi y naira hawi sa ta-li nai ly nichi i vui y teicha teinei palawn nai ne.
18 Khumi kahawichi i tako nai lam ly khutawi phang nai kangvang sangso, khawn kani si nai hawi atawm.
19 Na i py khumi hawi y naichi i tako nai lam ly vum kamta veng nai ne. Nichi ly atlym i py, mychi ati ai pathuikhe iy atlym nai mo, nanai pany u y.
20 Deang awi, kai i leu tangai ba; kai i thui naichi adawn patyp ba.
21 Hunichi ai mana khala py nangmy hawi amprei mo ly pany jo iy nang i paleung theung y pateungme ba.
22 Hunichi ai pany nai khumi lutengchi ly heng ai i, atho awm ai.
23 Nang ly mana dawn mo, nanai adawn patyp ba. Nang i dawn naichi my, nang i vui khym taham kahawi sa pi reng nai ne.
24 Mana khala py teng y nai leu katheu reng moh. Ka-chawi leu hawi ka-tawm huihai leu thui reng moh.
25 Nang ly nangmy i hawi naira ai a-ym iy, khumi takhrachi i meimai khen vam sy. Kaji naimy lu meung iy awm moh.
26 Nang i sa ai nai kalop ai, hawihai palai adawn iy so. Hunaibaly nang i sa nai leaungsai ngiereichi ly eaung ai. Ref 4.26: Heb 12.13
27 Hawi y nai ai en vui iy, langvawi lamtang angphri y naimy kataw tako ba.