5
Ami i aju chanau taphra y ai nai paka nai
1 Deang awi, nang ly dawn ryhpatyh iy cheng naira, pany thai praw nai cheng naira napi nai, kai i leuchi tangai ba.
2 Hunaibaly nang ly mana sa ai mo, nanai lam kateng pany ai. Nang i katheu nai leuchi py, cheng naira napi nai leuchi lawm ai.
3 Juvo awm nai neampachy i labeaungteng ly khawi hang kamta tiu iy, ni i pachawm nai py Olive asitui kamta panai ai i,
4 kangkhym y huni neampachy ly nang i tlang tleaung y paleung bi nai hawi patang naira ny y baly, takhra ati sai py hawi naira pei thai y.
5 Ni ly nang ai tavau saleaung y ang pahawi ai. Ni i tako nai lam ly tavau pri y chei nai lam ne.
6 Ni ly heng nai lam y tako y naimy angphri vui iy, tako reng nai ne. My i sa nai kalop ai mymy pany y.
7 Hunai deaungkho y kai i deangchi awi, kai i leu tangai u; kai i thui nai leu ai mana khala py tami u moh.
8 Huna nai neampachy teng i nai kamlo y asyn u; ni i yhm katheu pa-kho sahawi y malawn py chei u moh!
9 Ti y baly nangchi i awm nai tahm ly khumi takhrachi my nga vui ai; nangchi ly deaungdi thym khala my pahyp y naimy ana nai khumichi i kiu y dei u ai.
10 Apany vai y nai khumichi my, nangchi i yhmtheaung katui awm nai ngierei, ang la pi pawn ai. Naibaly nangchi i ko nai yhmtheaungchi ly khumi takhrachi my amtym ai.
11 Nangchi ly tlum tlang atho bai iy dei ai kasa nai khala, ira tleaung y tangam nai thym khala,
12 nangmy i paleung y, “Kai ly thui parip nai leu tangai ai nai ngai y lawh mo? Khumi takhrachi i parip nai ai py, tangai ai nai ngai y lawh mo?
13 Kai ly kaimy i sarachi i leu tangai y, tahm khai y lawh ly.
14 Vai, kai ly khumichi i mo y tahm anem vui lawh bo hi ly " nanai thui ai.
15 Nang ly nangmy i aju tlang tleaung y ka-ym awm ba. Nang i tamen nai ly ni leaungrei ai naini ne khyh ba.
16 Neampachy takhrachi hawi nga nai chanauchi ly nang ai hawi naira pei y leang.
17 Nang i chanauchi ly nang ai ang kry ai nai ne. Apany vai y naichi ai kry ai nai ny y leang.
18 Hunai deaungkho y nangmy i aju hawi phai amo theu ba. Nang hawi apom nai neampachy,
19 sisiunu kamta, khrei ai nai hawi iy neaung hawi nai neampachy hawi vanrei amo theu ba. Ni i paleung tleaung y amo theu ba. Ni i tamen naira my suithleng sy.
20 Deang awi, nang i tamen naira ly ati mana nai y takhra neampachy leaungrei teng y pei vui ai mo? Nang ly ati mana nai takhra neampacho aju i paleung tleaung y paleung amo theu lawh ai mo?
21 Areng ly nang i sa nai ngiereichi ai, ang niu pi se nai ne. Mymy ly nang i chei naira tleirei y, khen patawm jo nai ne.
22 Khumi hawi y nai i sa nai kamngochi ly deaung hawi atawm; huni khumi ly my i kamngo paleupy ra y man reng nai ne.
23 Ni ly amymy ai amkyn pajau y nai deaungkho y, dei nai ne. Khrikhri pa-rei tamang naimy ly ni ai tapreaung angawm y ang vum hai ai.