3
Deaungdichi i vui parip nai leuchi
1 Deang awi, kai i patiu pi naichi tami moh; kai i leu pei naichi pany jo ba.
2 Kai i patiu pi nai leuchi ly nang ai heng sau hai iy, nang chawn hai ai.
3 Ka-ym awm nai hawi leu meitang ai, mana khala py patlaw su moh. Hunichi ai nang i kaneaung y awi me ba; nang i paleung pheira y tajiu typ ba.
4 Nang ly huna nai sa baly, Tameuh i mo y hawi khumichi i mo y meimai nga ai.Ref 3:4 Lk 2:52
5 Areng ai ly nang i paleung verei hawimy ym ba; nangmy i pany naira ai, mana khala py a-ym moh.
6 Nang i sa naira tleirei y, Areng ai pany jo ba; huna baly mymy ly nang ai lam kateng ang patei ai.
7 Nang ly nangmy i cheng naira y paleung len moh. Areng i leu ai tangai iy, teng y naira y ly en vui ba.Ref 3:7 Rom 12.16
8 Huna nai sa baly asi kahawi teaung nai kamta, nang i tamochi tha ai i, nang i no patang naichi py dam ai.
9 Nang i li, hlaura i nga nai amti amjang athai chuluchi Areng teng y talam ba.
10 Huna nai sa baly nang i chohpaichi ly choh kawi iy, nang i chy-ychi ly kreip hang lem phraiphreaung ai.
11 Deang awi, nang ly Areng i thui parip nai ai hawihai dawn ryhpatyh iy, mymy i pany hai nai ne, nanai dawn jo ba.Ref 3:11 Joba 5.17Ref 3:11-12 Heb 12:5-6
12 Amhm ampo ly tahm khai ai hawi nai chapo ai thui parip reng nai kamta, Areng my py, mymy i tamen nai khumichi ai pajeng reng nai ne. Ref 3:12 Amt 3:19
13 Cheng naira nga nai khumi, ti y baly pany thai naira nga nai khumi ly taham hawi.
14 Huni ai nga nai ly tangka nga nai tleaung y hawi keh; nang i vui ly muku tleaung y py vang teng nai ne.
15 Cheng naira ly amia lengseaung tleaung y py vang teng keh; paleung ka-no hawi nai bawibawichi ly huni hawi pata pajau y leang.
16 Cheng naira ly nang ai heng sau nai, nang chawn nai hawi tahm awm ai nai ang pei reng nai ne.
17 Cheng naira ly nang i heng nai deung y tlamsa hai pajau; nang i heng nai jeungrei py, nang ai chymme naimy pahawi ai.
18 Cheng naira hau nai khumichi ly taham hawi; cheng naira ly nichi heng ai nai kry pi ai.
19 Areng ly mymy i cheng naira hawi khaileaung ai sa;
mymy i pany naira hawi kani khusang ai khaw hai.
20 Huni cheng naira hawi tavo tuichi leaung hai;
khupanymchi ra i kanitui nai hai.
21 Deang awi, nang i cheng naira hawi dawn pany praw thai nai cheng naira ai ly kry ba. Mana khala py nang hawi amprei hai vui moh.
22 Hunichi ly nang i vui tlamsa naimy heng ai nai hawi, amo theu parai naimy heng ai nai ka-vo sa pi ai.
23 Nang ly pathuikhe y naimy, heng nai ryrei ly chymme naira avum jojo ai.
24 Nang ly i angvyn nai khala, jeira awm ai ny y; vumtorei py i nem ai.
25 Nang ly khumi hawi y naichi i tlang tleaung y ali kamchai kamta, vaimy tym miu reng nai patangra ly avum ai, nanai paleung mawn moh.
26 Areng ly nang ai chymme naimy ang khai ai; mymy ly nang i kheu ai, deaung y man y ai nai ang kry ai.
27 Nang ly pajau nai neng tleirei y, kapahenra ngai nai khumichi ai pahen pi ba.
28 Nang i yhm deaungpachi ai, vaini my sabawm pajau baly, khawndam tym pa-rei ajeng moh.
29 Nang i yhm deaungpachi tlang tleaung y, no nga hai ai nai ati sai py dawn reng moh. Ni ly nang ai ym naimy, nang i sahawi y awm nai khumi ne.
30 Nang i tlang tleaung y mana khala py, khrukhra hai vai y nai khumi hawi, ati sai py ny y nai leu a-ei moh.
31 Khrukhra hai reng nai khumichi i tlang tleaung y, paleung angai y nai awm reng moh. Nichi i sa nai kamta sa ai nai paleung ka-dawn awm moh.
32 Ati mana nai mo nabaly Areng ly hawi y sa nai khumichi ai niu ngai y i, khumi kahawichi ai ly mymy hawi amkawm hai nai deaungkho y ne.
33 Areng ly khumi hawi y naichi i yhm ai amsawi lawi hai iy, khumi kahawichi i yhm ai ly amtheaung hai nai ne.
34 Mymy ly paleung len nai khumichi ai niu ngai y i, paleung apanem nai khumichi ai ly meimai khen nai ne.Ref 3.34: Jakob 4.6; 1 Pet 5.5
35 Cheng nai khumichi ly palo naira nga u ai; khumi hawi y naichi ly kangji nga u ai.