26
1 Kadam ly kanipui neng hawi py, kanitui ly choh tyn nai neng hawi py, amlau y nai kamta, khumi ka-khum ai palo nai ly amlau y nai ne.
2 Pasawi nai avum ai ataing y baly, nang ly amsawi lawi y leang. Nang i tlang tleaung y pasawi nai ly nang i sahawi mang akheang iy, mana khala py chym y nai tavochi hawi atawm.
3 Keaungngo i vui ly pakhaura, keaungngo kano kasau i vui ly nodo vui, khumi ka-khum i vui ly vuiha beang ataing nai ne.
4 Ati sai py ny y nai deng atyhtyh nai leu ai pathang pi hawihai nai khumi ly leu deng nai khumi ka-khum hawi vanrei atawm.
5 Ati sai py ny y nai leu deng atyhtyh nai ai pathang pi ngaulau baly, deng atyhtyh nai khumi ly my teng y cheng naira by y, nanai apany ai.
6 Nang ly khumi ka-khum ai savai palawn lawh baly, nangmy i kheu nyhrei tameang vui nai atawm. Nang ly patang naira avum ai.
7 Kheu tabai nai khumi ly my i kheu hawi tako thai y nai kamta, khumi ka-khum py, leu kacheng ai teaung thai y leang.
8 Khumi ka-khum ai palo nai ly lijaira y lengseaung akawi thangthleng nai kamta, ati sai py ny y.
9 Khumi kacheng i thui achih nai leu ai, katheu thai nai khumi ka-khum ly kiu y viu nai patho tha ai nai atho sa nai mhm-rah pavui nai khumi hawi atawm.
10 Avum ngaulau nai khumi ka-khum ai alai rumrang nai yhmkeung ly hu y awm nai khumi bawibawichi ai, no nga hai nai khumi ne.
11 Hawi y naira ai tlen pa-nyh sa bi nai khumi ka-khum ly amy i amleu ai palei teang nai ui hawi atawm.
12 Cheng naira by y nai khumi ka-khum ly cheng naira by y pui naimy amymy ai khumi kacheng, nanai amlawn nai khumi tleaung y athang khai naira awm.
13 Khumi napjang ly ati mana nai y, yhm angam mang y theu y mo? Ati ai jei nai mo? Khrangsichi ai jei nai deaungkho y a?
14 Katheu dawn ly kapiza hawi kho, paeaung nai kamta, khumi napjang ly mymy i ira tleaung y amkhiu lawh, amthai lawh naimy awm reng nai ne.
15 Phyrei khumichi ly pjang ala nai deaungkho y, teicha teinei ai my i kiu hawi la iy, labeaung y atui vai y.
16 Khumi napjang ly cheng naira awm iy lulip pany nai khumi leaung saryhrei tleaung y malawn py, mymy ly cheng, nanai athang khai nai ne.
17 Amy hawi amtawn abi y nai kalopra y abawi iy a-ei reng nai khumi ly lam y aleaung iy ui i kano theih nai khumi hawi atawm.
18-19 Khumi leaungrei ai tapawp-hyp chum iy, nang ai panui pachem hai nai teu, nanai thui nai khumi ly dei hai thai nai tavai ateaung hawi amau nai kamthu hawi atawm.
20 Theng by y baly mai ly dei vui nai kamta, leu pakei nai by y baly ka-jo rym nai ne.
21 Mai-ai i vui maisaei, mai kangveaung i vui ly theng, ka-jo mai i vui ly ajo reng nai khumi ne.
22 Ka-jo pakei nai leu ly tui parai nai teicha teinei ne i, achi ly huni ai pajawn reng lawh ly!
23 Hawi y nai paleung ai tamym nai teng y nai leu ly alai laawm ai pajui nai chy-y an hawi atawm nai ne.
24 Khumi kahawi amlawn reng nai khumi ly kapalo leu hawimy, my i niu ngai y nai paleung ai taphum vui nai ne.
25 Ni i leu ly tangai hawi parai teu i py, hunichi ai ym moh. Ati mana nai mo nabaly ni i paleung theung y, niu ngai y nai sai kawi palai nanai deaungkho y ne.
26 Ni ly my i niu ngai y nai paleung ai taphum vui teu i py, ni i hawi y sa naichi ai khumi luteng my niu ai.
27 Khumi takhrachi i vui deaungchi pateung pi nai khumichi ly huni deaungchira y, mymychi ai man lawh nai ne. Khumi takhra i tlang tleang y khaileaung akai hai ai nai sa nai khumi ly mymy i tlang tleaung y akai hai lawh reng nai ne.
28 Niu ngai y nai paleung awm nai khumi naini, khumi takhra i tlang tleaung y hawi y naira tym hai ai nai katapawp paleung awm pajau. Katau hawi y nai khumi i leu ly phra naira naini sa reng nai ne.