25
Solomon i leu kachengchi kamtawm
1 Juda samrang Hezekia i yhm y khumichi my cha tapeang nai, samrang Solomon i leu kachengchi ly hinichi ne.
2 Tameuh i sa naichi ly thiu parai nai deaungkho y, mymy i nang parai nai ai kaichi palo u nai ne. Samrangchi ly huni thiu parai nairachi ai thui pachai ai nai deaungkho y, nichi ai kaichi my tahm pasang u nai ne.
3 Samrang i paleung ly mana khala py, achi pany pajau y leang. Ni i dawn nai saichi ly kani i asang nai kamta, suida pangli i thiu parai nai kamta, achi pho pajau y leang.
4 Tangka ai patlawn vui nai khala, tangka thip kawp nai keung ly apu parai nai ateaung ha harei sa thai nai ne.
5 Hawi y nai tau pei nai khumi ai ly samrang teng i dengdairei patheu vui; hunaibaly samrang ly mipui i kangai peang ai.
6 Nang ly samrang i mo y angdo nai khala, amymy ai amlyh am-e moh; aly len nai khumi amlawn moh.Ref 25.6-7: Lk 14.8-10
7 Amy tleaung y tahm asang nai khumi leaungrei ai, meingtym aheng pi ai nai leu ang pei nai tleaung y ly tahm asang keh nai meingtym y ateh ai nai leu ang pei nai ly hawi keh nai ne.
8 Nang i mei hawi niu nai ryrei my, tara jeung y seu tamangtang moh. Takhra pany nai khumi leaungrei my, nang i tamang nai sai pany hai pi lawh baly, nang ly mana sa ai mo?
9 Nang ly nangmy i yhm deaungpa hawi, aly akhang y nai awm lawh teu baly, nangmyni tengtawi aly teang ai nai ka-vo so ba. Pany hai ai nai avo y naichi ai, amichi teng y amti pi moh.
10 Huna ny y baly khumi bawibawichi my, nang i labeaung amkyn y nai sai pany ai i, nangmy deungrei kangji nga ai.
11 Amlau parai nai leu katheu nai ly muku hawi ka-pu sa nai tangka ateaung hawi atawm nai ne.
12 Lulip pany naira angym nai khumi i pany hai nai leu ly tangai ai ngai nai khumi i vui y muku kiusabyh tleaung y py, muku tangcheng hawi sa nai ateaungchi tleaung y py vang teng keh nai ne.
13 Kani kabi asang nanai neng y choh tyn nai khala, tui savai kamchi ly khumi ai khesere hai nai kamta, ka-ym awm nai savai py, mymy ai pato nai keung i paleung ai khesere hai nai ne.
14 Langseaung pei ai, nanai adeu iy adeu nai kamta so y nai khumichi ly kanitui abawi y nai khupanym hawi ali kamta ne.
15 Paleung sau parai naimy thui pi rypsy nai leu ly paleung tang nai khumi ai paleung nau hai pajau. Samrangchi ai malawn py, pany hai pajau nai ne.
16 Khawi hang ai ngai nai tleaung y cho nei ala moh. Cha nei ala nai khumi ly paleu reng.
17 Nang i yhm deaungpachi teng y kie ala moh. Kie ala baly, ni ly nang ai ang palei ai i, ni my nang ai niu ngai y nai tym ai.
18 Nang i yhm deaungpa i tlang tleaung y teng y naimy seu rumrang nai ly haisau, thengbeang, ti y baly thailiho meaung hawi atawm.
19 Khri pa-rei aly aeang nai thym khala, ka-ym by y nai khumi teng y abyh nai ly ho lenghau nai hawi teicha teinei taai nai, ti y baly kheu tabai naimy lam tako nai atawm.
20 Paleung atho di nai khumi teng y khulym thui pi nai ly kaseih neng y amdeng parai nai khumi i ateaung ai leng pi vui nai, ti y baly tlang tamora y palawi phui nai hawi atawm.
21 Nang i paleung ka-e kajeu alam baly pacho; tui ahai baly nei ai nai tui pei.Ref 25.21-22: Rom 12.20
22 Hunaibaly ni ly kangji nga ai i, kangji paleung my ang kang nai avum ai. Naibaly Areng ly nang ai kawn vang ang pei ai.
23 Tosyh ali my kanitui syn nai kamta, thui preaung nai ly kado theu naira tym hai reng nai ne.
24 Josei atyhtyh nai aju hawi vanrei, yhm y awm ahawi nai tleaung y ly yhm amphu salo y awm nai ly hawi keh nai ne.
25 Kamlo paraira i satang kahawi thai nai ly tui kanghai tao phuirawm nai thym khala, tui savai nei nai hawi atawm.
26 Khumi hawi y nai ai leunghawi patlo jo nai khumi kahawi ly chai y nai tui sampum, ti y baly dei asi khai nai tuikan hawi atawm.
27 Khri pa-rei palo naira nga ai nai atho sa nai khumi ly khawi hang ai nei cha ala nai kamta, hawi y parai nai ne.
28 Amy i kado theu nai ai am-yh pajau y nai khumi ly mary apai by y nai deaungkho y, daihaulau nai mary hawi atawm nai ne.