27
1 Khawndam i vui mana khala py amlyh reng moh. Vaini hawi khawndam sala y mati na mo, nanai nang pany pajau y leang.Ref 27.1: Jakob 4.13-16
2 Nang ly amymy ai apalo moh. Khumi takhra my, ti y baly apany vai y nai khumi my naini nang ai palo na sy.
3 Lengseaung hawi spryh ly ji. Hawi y nai deaungkho y avum reng nai ngari kamtang ly hunichi tleaung y ji keh nai ne.
4 Kado theu nai paleung ly ana patheng nai ka-dawn, taphra ai ngai nai paleung ka-dawn awm nai ne. Na i py paleung angai y nai ly hunichi tleaung y hawi y keh.
5 Khumi takhra ai paleung hawi verei parip nai ly ni ai dawndan y, nanai athang khai nai tleaung y hawi keh.
6 Ahawi ka-dawi my, amy ai no-ei pa-rei ang thui nai ly paleung kahawi hawi ang thui nai teu. Na i py paleung ka-e my ang takawi nai khala ly paleung khai takhra ba.
7 Kajeu kawi nai khumi i vui ly khawi hang malawn py labeaung palai amlyn y. Na i py kajeu alam nai khumi i labeaung palai ly kho nai teicha teinei malawn py tuirym nai ne.
8 Amy i yhm hawi palo nai khumi ly tabu hawi palo nai tavo hawi atawm.
9 Rimiu hawi mui katuichi ly khumi i paleung ai amo theu hai. Na i py ngari kamtang ly paleung awmnemra ai phra hai vui nai ne.
10 Nang ly nangmy i ahawichi ai py, ngampo i ahawichi ai py, tami moh. Nang ly patang naira avum nai thym khala, ngamjo ngamnau teng y kasabawmra hnei moh. Nang i yhm deaungpa my ly kamlo y awm nai ngamjo ngamnauchi tleaung y malawn py, ang sabawm pajau nai ne.
11 Deang awi, cheng naira hawimy, kai i paleung ai amo theu hai ba. Kai ai thui preaung nai khumi ai, kai ly pathang ali teang pajau ai.
12 Tau cheng nai khumi ly ka-jeira avum ai nai pany yb i, asyn vui thai. Na i py tau cheng naira by y nai khumi ly ka-jeira hawi apadawi-ra naimy avum i, huni bo y uikheih naira nga nai ne.
13 Apany vai y nai khumi i kalum kalai ai kham pi ai nai adeu nai khumi ka-khum ai ly my i yhmtheaungchi ka-ymra khai hai ai nai avo nai ne.
14 Amy i ahawi kamrawi ai athorei my leu preng iy, khawn angthodyh i palaw reng nai khumi ly huni ahawi ai pasawi nai ne.
15 Josei ham nai aju ly kani nai nai kani y leaungdau leaungdau nai kachie tui hawi atawm.
16 Nang ly ali aho nai anawn hai ai nai, paka pajau na a? Asitui ai kiu padawi tleaung i nai, beu-py y pa-rei kasum thai na a? Hunai kamta huni neampachy ai awm pypy ai nai so thai y leang.
17 Tamo ai ly tamo tengtawi chiu pa-rei kata nai kamta, khumichi py amy tengtawi cheng naira amtiu ai nai tla.
18 Thaidu keung ai palum pachai nai khumi ly thaidu athai cha ai nai nga ai. Amy i yhmkeung ai kry ryhpatyh nai miseaung py, tahm pasang nai avum ai.
19 Khumi ly tui theung y amy i meimai niu nai kamta, amy i paleung theung y py, amymy ai niu teang nai ne.
20 Tavau saleaung y ly mana khala py, khumi kadei kawi vai y nai kamta, khumi i ngai naichi py, mana khala py angym bo, nanai by y.
21 Muku hawi tangka ai cheng, cheng y nanai ly mai hawi cham iy pany nai kamta, khumi leaungrei tahm awm, by y nanai py cham iy pany pajau.
22 Khumi ka-khum ai deivi pa-rei pakhau teu i py, ni i akhum nai ai ly khai su pa-rei pakhau pajau ai ny y.
23-24 Yhmtheaung katui ly akan y nai deaungkho y, nang i beram kanghuchi hawi, si kanghuchi ai kawp nai ryrei kry ba. Ati mana nai mo nabaly saleaung khutengchi malawn py, deungtasa khaw jo, nanai by y.
25 Nang ly choh keungchi hlau chum nai bo y, choh lumlichi ampho thym nai khala ly mawitleaung achachi ai py hlau ai nai tla.
26 Nang i beramchi teng i nga nai beram mui hawi, ateaung alangchi aneng pajau. Mi-i phyreichi ai jo iy khaileaung meingtymchi van pajau.
27 Jo kamthum mi-ichi teng i nai, nang hawi nang i yhm dengtheungchi i vui py, nang i miseaung neampachychi i vui py, mi-i kanu nga ai.